മഴക്കാല രോഗങ്ങൾക്കെതിരെയുള്ള മുൻകരുതലുകൾ ആയുർവേദത്തിലൂടെ

മഴക്കാലങ്ങളിൽ നമ്മുടെ ആഹാരശീലങ്ങളിലും മാറ്റങ്ങൾ വരുത്തേണ്ടത് അത്യാവശ്യമാണ്. ഈ കാലാവസ്ഥയിൽ ദഹനശക്തി കുറവായതിനാൽ എളുപ്പത്തിൽ ദഹിക്കുന്ന ആഹാരപദാർത്ഥങ്ങൾ ചെറുചൂടോടുകൂടി മാത്രം കഴി ക്കുക. ദഹനശക്തി വർദ്ധിപ്പിക്കുന്നതിനായി അഷ്ടചൂർണ്ണം അര ടീസ്പൂൺ വീതം ചൂടുവെള്ളത്തിലോ മോരിലോ ചേർത്ത് ദിവസവും രണ്ട് നേരം ആഹാരത്തിനു മുമ്പ് കഴിക്കുന്നത് കുട്ടികൾക്കും മുതിർന്നവർക്കും ഒരുപോലെ ഫലപ്രദമാണ്.

- ഡോ. ഷിബില കെ BAMS. MS(Ayu), Dept. Gynaecology & Obstetrics അസി. പ്രൊഫസ്സർ, Govt.ആയുർവ്വേദ കോളേജ്, തൃപ്പൂണിത്തുറ Email: [e-mail]

മഴ ശക്തി പ്രാപിക്കുന്നതോടൊപ്പം കോവിഡ് 19 രോഗബാധിതരുടെ എണ്ണം വർദ്ധിച്ചുവരുന്ന ഈ സാഹചര്യത്തിൽ മഴക്കാല രോഗങ്ങൾ കൂടി പിടിമുറുക്കുകയാണ്. ആയുർവേദ ശാസ്ത്രപ്രകാരം മഴക്കാലം രോഗസാധ്യതയേറിയ കാലമാണ്. അതുകൊണ്ട്തന്നെ ഇത്തരം രോഗങ്ങൾ വരാതിരിക്കാനും നമ്മുടെ രോഗപ്രതിരോധശേഷി വർദ്ധിപ്പിക്കുന്നതിനുള്ള മുൻകരുതലുകൾ എടുക്കേണ്ടത് അത്യാവശ്യമാണ്.

മഴക്കാലരോഗങ്ങളെ പൊതുവെ മൂന്നായി തരംതിരിക്കാം. മഞ്ഞപ്പിത്തം, ടൈഫോയ്ഡ്, എലിപ്പനി മുതലായ ജലത്തിലൂടെ പകരുന്ന രോഗങ്ങൾ, ചുമ, ജലദോഷം എന്നീ രോഗലക്ഷണങ്ങളോടു കൂടി വായുവിലൂടെ പകരുന്നവ; ചിക്കൻഗുനിയ, ഡെങ്കിപ്പനി തുടങ്ങി കൊതുകുകൾ പരത്തുന്ന രോഗങ്ങൾ എന്നിങ്ങനെ.

വേനൽക്കാലം കഴിഞ്ഞ് മഴക്കാലം വരുമ്പോൾ ആരോഗ്യകാര്യങ്ങളിൽ വളരെയധികം ശ്രദ്ധ ചെലുത്തണം. ഈ സമയങ്ങളിൽ നമ്മുടെ രോഗപ്രതിരോധശേഷി കുറവായിരിക്കും. അതുകൊണ്ട്തന്നെ പലവിധ രോഗാണുക്കൾ ശരീരത്തിൽ പ്രവേശിച്ച് രോഗങ്ങൾ പിടിപെടാനുള്ള സാധ്യതയും ഏറെയാണ്. ഇക്കാരണം കൊണ്ടാണ് ആയുർവേദശാസ്ത്രം കർക്കിടക ചികിത്സയ്ക്ക് പ്രാധാന്യം നൽകുന്നത്. ഇതിൽ ശോധനചികിത്സകളായ വമനം, വിരേചനം, വസ്തി, നസ്യം മുതലായ പഞ്ച കർമ്മങ്ങൾ ചെയ്ത് ശരീരത്തെ ശുദ്ധിയാക്കുന്നു.അതോടൊപ്പംതന്നെ നമ്മുടെ ദഹനശക്തിയും രോഗപ്രതിരോധ ശേഷിയും വർദ്ധിപ്പിക്കാൻ സഹായിക്കുന്ന മരുന്നുകൾ ചേർത്ത ഔഷധ കഞ്ഞി, പഥ്യാഹാരം എന്നിവയും ഉൾപ്പെടുത്തിയിരിക്കുന്നു. മഴക്കാലത്തിന്റെ തുടക്കത്തിൽ ഋതുശോധനം എന്ന പേരിൽ യുക്തമായ ഔഷധങ്ങൾ ഉപയോഗിച്ച് മൃദുവായി വയറിളക്കാനും ആയുർവേദശാസ്ത്രം അനുശാസിക്കുന്നു.