തായ്വാൻ വിശേഷങ്ങളിലൂടെ

ചിട്ടയായും ഭംഗിയായിട്ടുമാണ് മ്യൂസിയത്തിൽ ഓരോന്നും ക്രമീകരിച്ചിരിക്കു ന്നത്. പ്രത്യേകിച്ച് അവിടെയൊരു ദിനോസറിൻറെ യഥാർത്ഥ അസ്ഥികൂടം ഹാളിൻറെ മദ്ധ്യഭാഗത്ത് വച്ചിരിക്കുന്നത് കണ്ടാൽ മാത്രം മതി മ്യൂസിയത്തി നെക്കുറിച്ചുള്ള മതിപ്പുളവാകാൻ. ഒരു വലിയ ഹാളിൽ ഗ്ലാസിന്റെ കൂടുണ്ടാക്കി അതിനകത്താണ് ഇത് വച്ചിരിക്കുന്നത്. അതിന് ചുറ്റിനുമുള്ള മതിലുകൾ അറിവ് നല്കുന്ന പക്ഷി മൃഗാദികളുടെ വലിയൊരു ശേഖരം തന്നെയുണ്ട്.

- ഡോ. പി. കെ. ജയകുമാരി

സിങ്കപ്പൂരിൽ നിന്ന് തായ് പേയിലേക്കുള്ള ഫ്ലൈറ്റിലിരുന്ന് യാത്ര ചെയ്ത് വിമാനം ഉയരങ്ങളിലേക്ക് പറക്കുന്നതിന് മുൻപ് സിങ്കപ്പൂർ കടലിന് മുകളിലൂടെ പറന്നപ്പോൾ, നിരവധി കപ്പലുകൾ സമുദ്രത്തിൽ തമ്പടിച്ചിരിക്കുന്ന മനോഹരമായ കാഴ്ച കണ്ട് രസിച്ചു. അധികം താമസിയാതെ ഫ്ലൈറ്റ് ഉയരങ്ങൾ താണ്ടിയപ്പോൾ, പുറത്തെ കാഴ്ചയിൽ അവിടെവിടെയായി വെള്ളമേഘങ്ങൾ പറക്കുന്നതിനിടെ വിമാനത്തിൻറെ ചിറകുകൾ നിശ്ചലമായിരിക്കുന്നത് പോലെ തോന്നുമ്പോൾ എനിക്ക് വിരസത അനുഭവപ്പെടാറുണ്ട്. അപ്പോഴേക്കും 2,3 വയസ്സ് പ്രായം തോന്നിക്കുന്ന കൊച്ചുകുട്ടി എന്നേ ഒളിഞ്ഞ് നോക്കുകയും, കുസൃതി നിറഞ്ഞ ചിരി പാസാക്കി സൗഹൃദം പങ്കിടാൻ ശ്രമിച്ചു കൊണ്ടിരുന്നു. പെൺകുട്ടിയുടെ കണ്ണുകളിൽ പ്രകടമായ നിഷ്ക്കളങ്കമായ സ്നേഹം, എന്നേ കുറച്ച് സമയം ഭൂതകാലത്തേക്ക് കൂട്ടികൊണ്ട് പോയി.

ഫ്ലൈറ്റ് വൈകുന്നേരം ഏതാണ്ട് അഞ്ച് മണിയോടെ തായ് പേ സിറ്റിയിലെത്തി. നല്ല തണുത്ത കാറ്റും ചെറിയ മഴയും ഉള്ളതിനാൽ രാത്രി എട്ട് മണി പ്രതീതിയായിരുന്നു. ഞങ്ങൾ  ടാക്സി പിടിച്ച് ഹോട്ടലിലേക്ക് പോയി. വളരെ മനോഹരമായതും സെൻഡ്രലൈസ്ഡ് എ.സി ഉള്ളതുമായ മുറികളാണ്. റൂമിലിരുന്നാൽ പുറത്തെ കാഴ്ചകളൊക്കെ കാണാം. ജനലിൻറെ കർട്ടൻ റിമോട്ട് വച്ച് ഉയർത്തുകയും താഴ്ത്തുകയും ചെയ്യാം. റൂമിൽ എന്നെ ആകർഷിച്ചത് ഭിത്തിയുടെ പാനൽ കൊടുത്തിരിക്കുന്നതാണ്. അതിൽ രണ്ട് പാനലുകൾ മിററാണ്. അത് കൊണ്ട് കണ്ണാടി വക്കുന്നതിന് സ്ഥലം അന്വേഷിച്ച് നടക്കേണ്ട. വളരെ കുറച്ച് സ്ഥലത്ത് എങ്ങിനെ സൗകര്യങ്ങളോടെ കെട്ടിടം പണിയാമെന്ന് പഠനം നടത്തിയവരാണ് ജപ്പാൻകാർ. ജനൽപാളികൾ സ്ലൈഡ് ചെയ്യാവുന്നതും മുറിയുടെ മൂലയിൽ വരുന്നതിനാൽ ആ ഏരിയയും നന്നായി ഉപയോഗിക്കാനാവുന്ന വിധത്തിൽ ജനലിനോട് ചേർന്ന കബോഡുകളും സജ്ജീകരിച്ചിട്ടുണ്ട്. കുറെക്കാലം തായ്വാൻ ജപ്പാൻറെ അധീനതയിലായിരുന്നതിനാൽ കുറച്ചൊക്കെ ജപ്പാന്റേതിന് സമാനമായ രീതികളാണ് പിന്തുടരുന്നത്. റോഡുകളൊക്കെ ജപ്പാൻകാർ നിർമ്മിച്ചതാണ്. വളരെ പഴക്കമുള്ള റോഡുകളാണെങ്കിലും കാലത്തിനനുസരിച്ച് പുതുപുത്തൻ സൗകര്യങ്ങളെല്ലാം രൂപപ്പെടുത്തിയിട്ടുണ്ട്.