നല്ല ഭക്ഷണം ഉണ്ടാക്കാൻ കൂടണം ഇഷ്ടത്തോടെ കഴിക്കണം

അഭിമുഖം വ്യത്യസ്തമായ മറ്റൊരു അഭിമുഖമിതാ: പൊതുജനാരോഗ്യ മേഖലയിൽ സുദീർഘമായ അനുഭവസമ്പത്തുള്ള, സംസ്ഥാന സർക്കാരിന്റെ പ്രത്യേക അംഗീകാരങ്ങൾ നേടിയ ശിശുരോഗ വിദഗ്ധനാണ് തിരുവനന്തപുരത്ത് താമസിക്കുന്ന ഡോ. അമർ ഫെറ്റിൽ. കൗമാര ആരോഗ്യ മേഖലയിൽ നോഡൽ ഓഫീസറായി പ്രവർത്തിച്ചിട്ടുള്ള, അറിയപ്പെടുന്ന പോഷകാഹാര വിദഗ്ധൻ കൂടിയായ അദ്ദേഹവുമായി തിരുവനന്തപുരത്തെ യുറീക്കർമാർ നടത്തിയ അഭിമുഖം.

കുട്ടികൾ : ഡോക്ടർ മാമാ, എല്ലാവരും എപ്പോഴും പറയുന്നതാണ് നല്ല ഭക്ഷണം കഴിക്കണമെന്ന്. എന്താണ് നല്ല ഭക്ഷണം? ഞങ്ങൾക്കെപ്പോഴുമുള്ള സംശയമാണത്.

ഡോ. അമർ ഫെറ്റിൽ: ഞാനൊരു കുഞ്ഞു ചോദ്യം ചോദിക്കട്ടെ. വേനൽക്കാലത്ത് വഴിയരികിൽ വളരുന്ന ചെടിയും നമ്മുടെ വീട്ടിൽ നട്ടുവളർത്തുന്ന ചെടികളും തമ്മിൽ എന്തെങ്കിലും വ്യത്യാസം കണ്ടിട്ടുണ്ടോ? വഴിയരികിലുള്ളതിൽ പലതിനും വിളർച്ച കാണാം. പക്ഷേ നമ്മൾ നട്ടുവളർത്തുന്ന ചെടികൾക്ക് ആവശ്യത്തിന് വെള്ളവും വളവും നൽകുന്നതുകൊണ്ട് നല്ല പച്ചപ്പുണ്ടായിരിക്കും. ഇതുപോലുള്ള മാറ്റം നമ്മളിൽ ഉണ്ടാക്കുന്ന ഭക്ഷണമാണ് നല്ല ഭക്ഷണം. ഭക്ഷണം കഴിക്കുമ്പോൾ വളരും. വെറുതെ വളർന്നാൽ പോരാ. എല്ലാ അവയവങ്ങൾക്കും വികാസം ലഭിക്കണം. തലച്ചോറിന്റെ വികാസം നടക്കണം. പ്രതിരോധശേഷി നേടണം. അതായത് ആരോഗ്യകരമായ ജീവിതമാണ് ആവശ്യം. അതിന് നല്ല ആഹാരം വേണം. അങ്ങനെ പറഞ്ഞാലോ?

ധാരാളം വെള്ളം വേണം, ആവശ്യമാ യത്ര കാർബോഹൈഡ്രേറ്റ് വേണം, പ്രോട്ടീൻ വേണം, മിനറൽസ് വേണം, വൈറ്റമിനുകൾ വേണം, മൈക്രോ ന്യൂട്രിയന്റ്സ് വേണം, ഫൈബർ വേണം. ഇതൊക്കെ ആവശ്യത്തിന് ശരീരത്തിന് കിട്ടണം. പ്രകൃതിദത്ത ഭക്ഷണമാണ് നല്ല ഭക്ഷണം. വെളുത്ത അരിയേക്കാൾ നല്ലത് ചുവന്ന അരിയാണ് - തവിടോടു കൂടിയ അരിയാണ് ശരീരത്തിന് ഏറ്റവും നല്ലത് അവലിന്റെ കാര്യവും അങ്ങനെ തന്നെ.

ടിന്നിലും കുപ്പികളിലുമൊക്കെ കിട്ടുന്ന ഭക്ഷണമാണ് നല്ലതെന്ന ധാരണയുണ്ട്. അതു ശരിയല്ല. പരസ്യങ്ങളുടെ സ്വാധീനത്താൽ തോന്നുന്നതാണ്. നമ്മൾ സ്വന്തമായി നിർമിക്കുന്ന ഭക്ഷണമാണ് നല്ല ഭക്ഷണം. വാഴപ്പിണ്ടി, പപ്പായ, ഇലക്കറികൾ തുടങ്ങി നാട്ടിൽ കിട്ടുന്നവ കൊണ്ടുണ്ടാക്കുന്ന ഭക്ഷണം മികച്ചതു തന്നെ.