వంటిల్లే ఓ ఔషదాలయం

ఔషధాలు మన ఇంట్లోనే ఉన్నాయంటే నమ్మగలరా? మన ఇంట్లో వంటింట్లో - మనం తరచూ కొన్ని రకాల ద్రవ్యాలు చూస్తుంటాం.

ఔషధాలు మన ఇంట్లోనే ఉన్నాయంటే నమ్మగలరా? మన ఇంట్లో వంటింట్లో - మనం తరచూ కొన్ని రకాల ద్రవ్యాలు చూస్తుంటాం. అవి అనేక పోషక పదార్థాలను తమలో నిక్షిప్తం చేసుకున్నాయి. వీటిని సరైన రీతిలో ఉపయోగిస్తే ఇవి మనకు మంచి ఆరోగ్యాన్ని అందించడంలో ఎంతో తోడ్పడగలవు. ఐతే ఇంకెందుకు ఆలస్యం? ఆ పదార్థాలేమిటో, వాటి గొప్పతనం ఏ పాటిదో సంక్షిప్తంగా చూసేద్దామా...?

పసుపు:

పసుపు...ఈ పేరు భారతీయులకు సుపరిచితం. ఈ రంగు వారికి శుభసూచకం. వేలాది సంవత్సరాల నుండి భారతీయులకు దీని గురించి తెలుసు. నిజానికి ఈ ద్రవ్యాన్ని “ఔషధ గుణాల ఖజానా" అని చెప్పవచ్చు. ఎందుకంటే ఇది మనకు ఎన్నో రకాల అస్వస్థల నుండి స్వస్థత చేకూర్చగలిగే శక్తి కలిగినట్టిది కాబట్టి...!

విరేచనాలను అరికట్టడంలో, గ్యాస్ ట్రబుల్, ఆకలిలేమి వంటి సమస్యలను పరిష్కరించడంలో ఇది బ్రహ్మాండంగా పనిచేస్తుంది. మద్యపానం వల్ల, మాదకద్రవ్యాల వల్ల చెదిరిపోయిన కాలేయాన్ని ఇది మళ్ళీ కుదురు కొనేలా చేస్తుంది. చర్మం యొక్క మర్మం తెలిసిన పదార్థం కావడంతో, ఇది చర్మానికి సరికొత్త కళను తెచ్చిపెడుతుంది. దీన్ని కొద్దిగా పాలల్లో కలిపి తీసుకుంటే జలుబు, దగ్గు మొదలైనవి దెబ్బకు తగ్గుముఖం పట్టాల్సిందే.