பேரு தூக்கு துரை... ஹீரோ யோகிபாபு...ஹீரோயின் இனியா!

இயக்குநர் டென்னிஸ் மஞ்சுநாத் இயக்கத்தில் கலகல காமெடிப் படமாக உருவாகியிருக்கும் படம் ‘தூக்குதுரை’.

- ஷாலினி நியூட்டன்

‘ட்ரிப்’ படத்திற்குப் பிறகு டென்னிஸ் இயக்கியிருக்கும் இரண்டாவது படம் இது. ‘‘மூணு காலங்களில் பயணிக்கும் பீரியாடிக் படம் இது...’’ முகம் மலர்கிறார் இயக்குநர் டென்னிஸ் மஞ்சுநாத்.  

 

‘தூக்குதுரை’னு பெயரே அம்சமா இருக்கே..? தலைப்பின் காரணம் என்ன..?

பொதுவாகவே சில கிராமங்கள்ல சிறு, குறுநில மன்னர்களுடைய வகையறாக்கள் இன்னமும் வாழ்ந்துட்டு இருக்காங்க. ஒரு காலத்திலே பந்தாவா, ஆட்சி பீடத்திலே ஆட்சி செய்தவங்க. இன்னைக்கு பொது மக்கள்ல ஒருத்தங்களா, எல்லாரையும் மாமன், மச்சான்னு கூப்பிட்டுட்டு இருப்பாங்க.

இது 19ம் நூற்றாண்டு மன்னர் வகையறா!

ஆனாலும் கோயில் திருவிழா, ஊர் மரியாதை இதெல்லாம் இன்னைக்கும் மரியாதை நிமித்தமா அந்த குடும்பத்து சார்பா யாருக்கோ செய்திட்டு இருப்பாங்க.

ஆரம்பத்திலே ‘மன்னர்’ சார்ந்த பெயர்தான் யோசிச்சோம். ஆனா, ‘மாமன்னன்’ ஏற்கனவே உருவாகிட்டு இருக்கறதால இந்தப் படத்துக்கு வேற பெயர் யோசிச்சோம். மன்னர்களை துரைன்னும் சொல்றதுண்டு. தனக்கான மரியாதையை தூக்கும் துரைதான் இந்த ‘தூக்குதுரை’.

ஓர் இயக்குநரின் கரியர்ல இரண்டாவது படம் மிகவும் முக்கியம். ‘தூக்குதுரை’ எப்படி வந்திருக்கு?

பொதுவா எந்த ஜானர்ல வேணும்னாலும் சுலபமா கதை சொல்லிடலாம். ஆனா, காமெடி மட்டும் பெரிய டாஸ்க். முதல் படம் ‘டிரிப்’ முடிச்சப்ப சில இடங்கள்ல அந்தப் படம் ஒர்க்அவுட் ஆச்சு, விமர்சன ரீதியா சில இடங்கள்ல ஒர்க்கவுட் ஆகல. அதனால இன்னும் சிறப்பா அடுத்த படம் செய்யணும்னு இந்தப் படத்தை எடுத்திருக்கேன்.