மொய் வேண்டாம்...பள்ளிப் பாடப் புத்தகங்கள் கொடுங்க!

கோவையில் நடந்த நெகிழ்ச்சியான திருமணம்!

- ஷாலினி நியூட்டன்

தமிழர்கள், இந்தியப் பாரம்பரிய திருமணங்களில்தான் மிக முக்கிய அம்சமாக மொய்ப்பணம் வைக்கப்படும். குறிப்பாக திருமண வீட்டுக்கு வெறும் கையோடு செல்லக் கூடாது என்பதே சம்பிரதாயம். அவரவர் விருப்பத்திற்கு மொய்ப் பணமாகவோ அல்லது அன்பளிப்பாகவோ, இன்னும் சில பெரும் பணக்காரர்கள் திருமணங்களில் பூங்கொத்துகளோடோ சென்று விடுவார்கள்.

இன்னும் சிலர் மரக்கன்றுகளை அன்பளிப்புகளாக மணமக்களுக்குக் கொடுப்பது அல்லது ரிடர்ன் கிஃப்ட் எனப்படும் தாம்பூலப் பைகளுடன் மரக்கன்றுகள் அளிப்பது என சமூகம் சார்ந்து செயல்படுகிறார்கள்.

ஆனால், கோயமுத்தூர், செல்வபுரம் பகுதியைச் சேர்ந்த மசாலா, மளிகை வியாபாரி ஜவஹர் சுப்பிரமணியம் தனது மகளின் திருமணத்திற்கு வந்தவர்களிடம் ‘மொய் வேண்டாம், அதற்கு பதிலாக 10 மற்றும் 12ம் வகுப்பு கைடுகள், மற்றும் மேற்படிப்பிற்கான புத்தகங்களாகக் கொடுங்கள்’ எனக் கேட்டு வாங்கியிருக்கிறார்!

‘‘என் முழுப் பெயர் ஜவஹர் சுப்பிரமணியம். மனைவி பத்மாவதி, என் கூடவே என்னுடைய தொழிலைப் பார்த்துக்கறாங்க. எங்களுக்கு மூன்று மகள்கள். பெரியவ ஸ்வர்ண பிரபா. இரண்டாம் மகள் லட்சுமி பிரியா, ஆயுர்வேத மருத்துவர். மூன்றாம் மகள் தர்ஷினி தனியார் கல்லூரியிலே துணைப் பேராசிரியர்.

எங்களுடைய மூத்த மகள் ஸ்வர்ண பிரபாவுக்குத்தான் திருமணம் பேசி முடித்திருந்தோம். இந்தத் திருமணத்திற்கு வருகிற விருந்தினர்களிடம் பத்திரிகையிலேயே தெளிவா மொய்ப் பணம் வேண்டாம்னு அச்சிட்டுக் கொடுத்தோம்.