ராண்டார் கையை தெரியும்...மாபூஷி ரங்கதுாையை தெரியுமா?

‘‘சினிமா, பத்திரிகை, வானொலி, டிவினு பல இடங்கள்ல அப்பா பணியாற்றியிருக்கார்னு தெரியும். குறிப்பா, சினிமா சம்பந்தமான விஷயங்கள்ல ஜாம்பவானாக விளங்கியவர்னும் தெரியும். நிறைய எழுதுவார். ஆழமாக படிப்பார்.

- ஆர்.சந்திரசேகர்

ஆனா, அதையும் தாண்டி தனித்துவமாக இருந்திருக்கார் என்பது அவரின் மறைவிற்குப் பிறகு அவரின் நண்பர்கள் சொல்ற செய்திகள்ல இருந்தே தெரிஞ்சுக்கிட்டேன். அப்பாவைப் பற்றி அவர்களின் புகழாரத்தைக் கேட்குறப்ப மனசுக்கு ரொம்ப சந்தோஷமாக இருக்கு...’’

நெகிழ்ந்து பேசுகிறார் பிரியா. சமீபத்தில் மறைந்த திரைப்பட ஆய்வறிஞர், சமூக வரலாற்றாளர், எழுத்தாளர், கட்டுரையாளர் எனப் பன்முகத்தன்மையுடன் விளங்கிய ராண்டார் கையின் மகள் இவர்.

சினிமா சம்பந்தமான அத்தனை வரலாற்றுத் தகவல்களையும் விவரமாகவும், தெளிவுடனும் அள்ளித் தந்தவர் ராண்டார் கை. ‘தமிழ்ச் சினிமா வரலாறு’ உள்ளிட்ட ஐம்பதுக்கும் மேற்பட்ட நூல்களை எழுதியவர். ‘மெமரிஸ் ஆஃப் மெட்ராஸ்’ என்பது இவரின் கடைசிப் புத்தகம்.‘

தவப்புதல்வன்’ திரைப்படத்தில் நடிகர் திலகம் சிவாஜி கணேசன் மேடை நிகழ்ச்சியில் பாடும், ‘லவ் இஸ் ஃபைன் டார்லிங்...’ என்ற பாடலின் வரிகளை எழுதியவர் ராண்டார் கைதான். ஆரம்பத்தில் வாசகர்கள் அவரை ஓர் ஆங்கிலேயர் என்றே நினைத்தனர். ஆனால், அவரின் இயற்பெயர் மாடபூஷி ரங்கதுரை என்பது பலர் அறியாதது.

இப்போது இவரின் அத்தனை நூல்களையும், இதனுடன் அச்சில் ஏறாத எழுத்துகளையும் தொகுத்து ராண்டார்கையின் நண்பர் ஸ்ரீதரன் உதவியுடன் வெளிக்கொண்டு வரவுள்ளார் பிரியா. இதனால் சினிமா, சமூக வரலாறு உள்ளிட்ட பல்வேறு பகுதிகளில் இன்னும் அறியப்படாத பல அரிய தகவல்கள் கிடைக்கலாம் என உற்சாகமாகச் சொல்கிறார்.

‘‘அப்பா, 1934ல் இன்றைய ஆந்திர மாநிலம் நெல்லூரில் பிறந்தார். அப்போது சென்னை மாகாணமாக இருந்தது. பச்சையப்பன் கல்லூரியில் பி.எஸ்சி முடிச்சிட்டு அப்புறம் பி.எல் பண்ணினார். அப்பாவின் அப்பா அதாவது என் தாத்தாவும் சட்டம் படிச்சவர். அதனால, அப்பாவும் பி.எல் படிச்சார்.

படிப்பு முடிச்சதும் பிரபல வழக்கறிஞரான வி.சி.கோபால் ரத்னம் சார்கிட்ட ஜூனியராக சில ஆண்டுகள் இருந்தார். அப்போ, வி.சி.கோபால் ரத்னம் சாரைப் பார்க்க பிரபல சினிமா ஸ்டார்ஸ் உள்பட பெரிய பெரிய பிரமுகர்கள் எல்லாம் வருவாங்க.

அப்படியாக அப்பாவுக்கு அவங்கள பத்தின பின்புலம் எல்லாம் தெரியவந்திருக்கு. அப்பாவுக்கும் சினிமா மேல் அதீத ஆர்வம். நிறைய ஹாலிவுட் படங்கள் பார்ப்பார். சினிமா சம்பந்தமான ஆங்கிலப் புத்தகங்களும் படிப்பார்.