மகளிர் இட ஒதுக்கீடு...வராது...ஏன்னா வராது!

சிறப்பு பாராளுமன்றக் கூட்டத்தில் பிரதமர் மோடி இந்த முறை எந்த குண்டை வீசப் போகிறாரோ என்று நகத்தைக் கடித்துக்கொண்டிருந்த எதிர்க் கட்சிகளுக்கு மகளிர் இட ஒதுக்கீட்டு மசோதாவை சட்டமாக்கியதன் மூலம் அது குண்டு அல்ல கம்பி மத்தாப்பு என்று காட்டியிருக்கிறார்.

- டி.ரஞ்சித்

ஆனாலும் இந்தக் கம்பி மத்தாப்புக்குள்கூட பெரியதொரு டைனமைட் இருப்பதாக கொந்தளிக்கிறார்கள் விமர்சகர்கள்.மகளிர் இட ஒதுக்கீடு கோரிக்கைக்கான போராட்டம் பலகாலமாக இந்தியாவில் நடந்துவருகிறது. பலவேளைகளில் அதை சட்டமாக்குவதற்கான முயற்சிகளும் பாராளுமன்றத்தின் இரு அவைகளிலும் நடந்தன. ஆனால், என்ன கெட்ட காலமோ... பட்ட காலிலேயே படும் கெட்ட குடியே கெடும் என்பதுபோல் இந்த மசோதாவுக்கு போதாத காலமாக இருந்தது.

ஆனால், எந்த பிரதமராலும் கொண்டு வரமுடியாத சட்டத்தை வெற்றிகரமாக பாராளு மன்றத்தில் நிறைவேற்றியதன் மூலம் இந்தியப் பெண்களின் நம்பிக்கை நட்சத்திரமாக ஒரேநாளில் மாறிப் போயிருக்கிறார் மோடி. ஆனாலும் இந்த சட்டம் பல குறைகளுடையதாக இருக்கிறது. அதிலும் இந்தச் சட்டம் இன்னும் பல தடைகளைத் தாண்டித்தான் நிறைவேற உள்ளதால் இது அமல்படுத்தப்படுவது கடினம் என விமர்சகர்கள் அக்கு வேறு ஆணி வேறாகப் பிரித்து மேய்கின்றனர்.

இப்போது இருக்கும் 543 பேர் அடங்கிய மக்களவையில் 78 பெண் எம்பி-க்கள் இருக்கின்றனர். இது 15 சதவீதத்துக்கும் குறைவு. அதேபோல 245 பேர் அடங்கிய மாநிலங்களவையில் 24 எம்பி-க்கள், அதாவது 14 சதவீதம் மட்டுமே பெண்கள். சுமார் பாதிக்குப் பாதியான பெண்கள் கொண்ட இந்திய மக்கள் தொகையில் பெண்களின் அரசியல் பிரதிநிதித்துவம் மிகவும் மோசமான நிலையில் இருப்பதாகவே இந்த புள்ளிவிவரங்கள் சொல்கின்றன.

எந்நேரமும் சண்டை, போர், பட்டினி என்று கிடக்கும் ருவாண்டா எனும் ஆப்பிரிக்க நாட்டில்கூட சுமார் 56.3 சதவீத பெண்கள் அரசியலில் கோலோச்சுகிறார்கள். அதைவிட நம் பக்கத்து நாடான நேபாளத்தில் 33.2 சதவீதப் பெண்கள் அரசியல் அதிகாரத்தில் இருக்கிறார்கள். 

பெண்களின் பிரதிநிதித்துவம் இந்திய பாராளுமன்றத்தைவிட மாநில சட்டமன்றங்களில் இன்னும் மோசம்.மத்தியப் பிரதேசம், ஆந்திரா, தமிழ்நாடு, கேரளா, அருணாச்சலப் பிரதேசம், ஒடிசா, மற்றும் குஜராத்தில் 10 சதவீதத்துக்கும் குறைவான பெண் எம்எல்ஏக்கள். பீகார், உத்தரப்பிரதேசம், அரியானா, தில்லி, பஞ்சாப், ராஜஸ்தான், மற்றும் உத்தரகாண்டில் 10 லிருந்து 12 சதவீதம் பெண் எம்எல்ஏக்கள்.