ஆக்ஷன்+ அதிரடி = ரெய்டு

‘எலிய புடிக்கணும்னா பொறி வைக்கணும்; புலிய பிடிக்கணும்னா புலிதான் வரணும்...’

- ஷாலினி நியூட்டன்

‘பிரம்மா உன் தலையெழுத்த பென்ல எழுதியிருந்தா, நான் கன்ல எழுதிருவேன்...’

இப்படி டீசரிலேயே வசனங்களும் ஆக்‌ஷன் அதிரடியும் தெறிக்கின்றன. அறிமுக இயக்குநரும் டைரக்டர் எம்.முத்தையாவின் உதவியாளருமான எஸ்.பி.கார்த்தி இயக்க, எஸ்.கே. கனிஷ்க் மற்றும் ஜிகே ஆகியோர் தயாரித்திருக்கின்றனர். கதிரவன் ஒளிப்பதிவு, மணிமாறன் எடிட்டிங், கே.கணேஷ் ஸ்டண்ட் மற்றும்  சாம் சி.எஸ் இசையமைத்துள்ளார்.

‘பாயும் ஒளி நீ எனக்கு’, ‘இறுகப்பற்று’ என தொடர்ந்து விக்ரம் பிரபு படங்கள் பாராட்டுகளைப் பெற்றுக் கொண்டிருக்கும் நிலையில் தற்போது தீபாவளி ரிலீஸ் சரவெடி பட்டியலில் தன்னையும் இணைத்துக் கொண்டதில் மகிழ்ச்சியுடன் பேசத் தொடங்கினார் விக்ரம் பிரபு.

இந்திய சினிமாவில் ஏராளமான ‘ரெய்டு’கள் உள்ளன... இந்த ‘ரெய்டு’ எதைப் பற்றி?

பொதுவா ரெய்டு அடிப்படையிலான படங்கள் எல்லாமே இந்தியாவில் நடந்த ஏதாவது ஒரு உண்மைச் சம்பவத்தை அடிப்படையாக வைத்துதான் வெளியாகியிருக்கும். இந்தப் படம் ஒரு சம்பவம்ன்னு இல்லாம பல சம்பவங்களின் கோர்வையாக இருக்கும்.

அதிகாரபூர்வ கன்னட ‘டகரு’ படத்தின் ரீமேக்... அந்த ஸ்பெஷலை இதில் எதிர்பார்க்கலாமா?

சிவராஜ்குமார் சார் அளவிற்கு மாஸ் கிளாஸ் படத்தில் நான் கொடுத்திருக்கிறேனா என்பதை நீங்கதான் பார்த்துட்டு சொல்லணும். என்னுடைய கேரக்டர் பெயர் பிரபாகரன். நிறைய ஆக்‌ஷன் படங்கள் நடிச்சிருக்கேன். நிச்சயம் இந்தப் படம் அவற்றிலிருந்து வித்யாசமா இருக்கும். இந்தப் படத்தின் உரிமை ஏற்கனவே முத்தையா சார் வாங்கி வைத்திருந்தார்.