ஆக்ஷன் ஹீரோயின்ஸ்!

‘‘‘ஒய் டூ மென் ஹேவ் ஆல் ஃபன்...’ அதனால்தான் என்னுடைய படங்களில் நாயகிகளின் தைரியமான முகத்தையே அதிகம் காட்ட விரும்புவேன். ஏன் பசங்க மட்டும்தான் எப்பவும் ஆக்‌ஷன், அதிரடியிலே நடிக்கணுமா என்ன?’’

- ஷாலினி நியூட்டன்

இயக்குநர் லோகேஷ் கனகராஜ் வார்த்தைகள் இவை. ஏஜென்ட் டீனா, எலிசா தாஸ்... என சமீபத்திய பெண் ஆக்‌ஷன் அதிரடி கேரக்டர்கள் அதிகம் பேசப்படுவதும், டிரெண்டாவதும் அதிகரித்து வருகின்றன.

ஆனால், இந்த டிரெண்ட் இங்கே துவங்கியதல்ல. விஜயசாந்தி, ஜோதிகா... என இந்த கலக்கல் கதாநாயகி ஆக்‌ஷன் காட்சிகள் எல்லாம் இணையம் இல்லாத காலத்திலேயே பிரபலம்.

அப்படி நாயகிகள், நடிகைகளின் ஆக்‌ஷன் காட்சிகள் தமிழ் சினிமாவில் எங்கு துவங்கி, எப்படி உருமாறின? ஒரு விளக்கமான அலசலைப் பார்ப்போமா?

இதற்கு முதல் விதை போட்டவர்கள் சி.ஐ.டி. சகுந்தலா மற்றும் விஜயலலிதா இருவர்தான். இவர்கள் இருவருமே வில்லன் கூட்டத்தில் ஒரு கிளாமர் மங்கை. அவர்கள் கேட்கும்போது நடனம் ஆடும் பாணியில்தான் பல படங்களில் பயணித்தார்கள்.

ஆனால், இவர்களை வேறு ஒரு கோணத்தில் தைரியமான பெண்களாகவும், ஆக்‌ஷன் அதிரடி கெட்டப்பிலும் பார்த்தவர் ஜெய்சங்கர்.

அவரின் ‘சிஐடி சங்கர்’ (1970) படத்தின் மூலம் சகுந்தலா ஸ்பை கதாநாயகியாக ஜெய்சங்கருக்கு உதவுவதுடன் சண்டையிலும் மாஸ் காட்டியிருப்பார். இதனால்தான் இவரின் சகுந்தலா பெயருக்கு முன்னால் சிஐடி சேர்ந்துகொண்டது.

அதேபோல் ‘தென்னிந்திய ஜேம்ஸ் பாண்ட்’ எனச் செல்லமாக அழைக்கப்பட்ட ஜெய் சங்கருடன் விஜயலலிதா அதிகம் நடித்தது மட்டுமின்றி பழிவாங்கும் வில்லி, வில்லனுடன் இணைந்து பயங்கரமான திட்டங்கள் தீட்டுவது... என தமிழ், மற்றும் தெலுங்கு சினிமாவில் நடித்தார்.  இதனால் ரசிகர்கள் விஜயலலிதாவை ‘லேடி ஜேம்ஸ் பாண்ட்’ எனச் செல்லமாக அழைத்தனர்.

‘நீலகிரி எக்ஸ்பிரஸ்’ (1968), ‘நூற்றுக்கு நூறு’ (1971), ‘வல்லவன் ஒருவன்’ (1966) என இவரின் ஆக்‌ஷன் லிஸ்ட் படங்கள் ஏராளம். இவர்கள் மட்டுமின்றி வாள் சண்டையிட்ட ஜெயலலிதா,
சாவித்திரி உள்ளிட்டோரும் இதில் அடக்கம்.