தமிழ் சினிமாவின் மோஸ்ட் வான்டட் ரைட்டர் எழிச்சூர் அரவிந்தனுடன் ஒரு சந்திப்பு

சமீபத்தில் சந்தானம் நடித்து ஹிட்டடித்த படம் ‘இங்க நான்தான் கிங்கு’.

இந்தப் படத்துக்கு கதை, திரைக்கதை, வசனம் எழுதியவர் எழிச்சூர் அரவிந்தன். மாநில அரசு வழங்கிய ‘சிறந்த கதாசிரியர்’ விருது, மயிலாப்பூர் அகடமி விருது, கார்த்திக் பைன் ஆர்ட்ஸ் விருது, பல அடுக்குகளாக அடுக்கி வைக்கப்பட்ட புத்தகங்கள் என எழிச்சூர் அரவிந்தனைச் சுற்றிலும் புத்தகங்களும், விருதுகளும் அடுக்கி வைக்க இடம் இல்லாதளவுக்கு நிறைந்திருந்தன. மனைவி ராஜேஸ்வரி, மகள் தூரிகா என குடும்பமாக நமக்கு வரவேற்பு கொடுத்தார்கள்.

டிராமா, சின்னத்திரை, சினிமா என பல தளங்களில் பிசியாக இருப்பவர். கதாசிரியர், வசனகர்த்தா என பன்முகத்துடன் பயணிக்கும் இவருடைய நகைச்சுவைக்கு ஷங்கர், பார்த்திபன், லிங்குசாமி, எழில் போன்ற ஜாம்பவான் இயக்குநர்கள் ரசிகர்கள் மட்டுமல்ல, தங்கள் படங்களின் கதை விவாதத்திலும் பங்கேற்க வாய்ப்பு அளித்துள்ளார்கள்.

அதுமட்டுமல்ல, தமிழ் சினிமாவின் மோஸ்ட் வான்டட் வசனகர்த்தா இவர்தான்!எழுத்து மீதான ஆர்வம் எப்படி வந்தது? சினிமாவுக்கு வசனம் எழுதுவதுதான் உங்கள் நோக்கமாக இருந்ததா? சொந்த ஊர் காஞ்சிபுரம் மாவட்டம் எழிச்சூர். பிறந்தது, வளர்ந்தது எல்லாம் சென்னை சிந்தாதிரிப்பேட்டை. எங்க ஏரியாவுல ‘காசினோ’, ‘கெயிட்டி’, ‘மெலடி’, ‘ஆல்பர்ட்’, ‘சாந்தி’, ‘தேவி’ என தியேட்டர்களுக்கு பஞ்சமே இருக்காது.அம்மா சிவாஜி சாரின் பரம ரசிகை.

சிவாஜி சார் படத்தை முதல் நாள் முதல் ஷோ தவறாமல் பார்த்து விடுவார். ‘சாந்தி’ தியேட்டர் மேனேஜர் வேணுகோபால் சாரிடம் முன்கூட்டியே டிக்கெட் எடுத்து வைக்கச் சொல்லுமளவுக்கு பரிச்சயம்.

அப்பாவுக்கு ஹை கோர்ட்ல வேலை. சகோதரர் கல்லூரி துணை முதல்வர். எப்படிப் பார்த்தாலும் என்னைத் தவிர குடும்பத்தில் உள்ள எல்லோரும் படிச்சவங்க. நான் அதிகமா படிக்கல. சினிமா தியேட்டர்தான் என்னுடைய ஸ்கூல். சினிமா ஹீரோ, டைரக்டர்கள்தான் என்னுடைய டீச்சர்ஸ்.

அப்படி எனக்குள் சினிமா ஆர்வம் அதிகமாகவே, எப்படியாவது நடிகராகிவிட வேண்டும் என்றுதான் ஆரம்பத்தில் நினைத்தேன். ஆர்வமிகுதியில் தனியார் திரைப்படக் கல்லூரியில் சேர்ந்தேன். ரொம்ப தாமதமாகத்தான் அதெல்லாம் டூபாக்கூர் இன்ஸ்டிடியூட்ன்னு தெரிஞ்சுச்சு. நடிக்க சான்ஸ் தர்றேன்னு பணம் கொடுத்து ஏமாந்த அனுபவமும் இருக்கு.