YOUTH MP's...

சமீபத்தில் நடந்துமுடிந்த 18வது மக்களவைத் தேர்தலில் சில இளைஞர்களும், இளம் பெண்களும் வெற்றி பெற்று பெரும் ஆச்சரியம் அளித்துள்ளனர்.

- பேராச்சி கண்ணன்

வரும் ஜூன் 24ம் தேதி தொடங்கவுள்ள மக்களவையின் முதல் கூட்டத் தொடரில் பதவியேற்க இருக்கும் அவர்களைப் பற்றிய ஷார்ட் நோட்ஸ் இது.

சஞ்சனா ஜாதவ்

ராஜஸ்தான் மாநிலம் பரத்பூர் மக்களவைத் தொகுதியிலிருந்து தேர்ந்தெடுக்கப்பட்ட 26 வயதே நிரம்பிய பெண் இவர். தலித் சமூகத்தைச் சேர்ந்தவர். தற்போது காங்கிரஸ் சார்பில் போட்டியிட்டு வெற்றி பெற்றுள்ளார்.

அதுவும் பாஜக வேட்பாளர் ராம்ஸ்வரூப் கோலியை 51,983 வாக்குகள் வித்தியாசத்தில் வென்றுள்ளார். அதுமட்டுமல்ல. ராஜஸ்தான் முதலமைச்சர் பஜன்லால் சர்மாவின் சொந்த ஊரான பரத்பூரில் அவர் வெற்றியைப் பெற்றுள்ளார் என்பதுதான் பலரையும் ஆச்சரியத்தில் ஆழ்த்தியுள்ளது.

அத்துடன் அரசியல் குடும்பப் பின்னணி இன்றி இந்த இடத்தை அவர் பிடித்துள்ளார் என்பதும் கவனிக்க வைத்துள்ளது. இவர் 1998ம் ஆண்டு பரத்பூர் மாவட்டத்திலுள்ள புசாவரில் பிறந்தார். இவரின் தந்தை ஹர்பஜன், ஒரு சாதாரண கான்டிராக்டர்.  

கடந்த 2019ம் ஆண்டுதான் சஞ்சனா ஜாதவ், மகாராஜா சூரஜ்மல் பிரிஜ் பல்கலைக்கழகத்தின் கீழ் வரும் காந்தி ஜோதி கல்லூரியில் பிஏ பட்டப்படிப்பு முடித்தார். பின்னர் எல்எல்பி படித்தார்.

இதற்கிடையே கப்தான் சிங் என்பவரை மணமுடித்தார். கணவர் கப்தான் சிங், ராஜஸ்தான் போலீஸில் கான்ஸ்டபுளாக பணி செய்து வருகிறார். இவர்களுக்கு இரண்டு குழந்தைகள் இருக்கின்றனர். தற்போது அல்வார் மாவட்டத்தில் உள்ள சாமுஞ்சி கிராமத்தில் வசித்து வருகிறார்.

அங்கே வார்டு தேர்தலில் வெற்றி பெற்றார். இதுவே அவரின் முதல் அரசியல் பிரவேசம். பின்னர் கடந்த 2023ம் ஆண்டு ராஜஸ்தான் சட்டசபைத் தேர்தலில் காங்கிரஸ் கட்சியின் சார்பில் கத்துமர் தனித்தொகுதியிலிருந்து போட்டியிட்டார்.

இதில் 409 வாக்குகள் வித்தியாசத்தில் தோல்வியைத் தழுவினார். இதனால் காங்கிரஸ் கட்சி கத்துமர் தொகுதி இடம் பெறும் பரத்பூர் மக்களைவைத் தொகுதிக்கு இவரைப் போட்டியிட வைத்தது.

அப்போது ராஜஸ்தான் காங்கிரஸ் தலைவர்களும், பிரியங்கா காந்தியும் இணைந்து, ‘நான் ஒரு பெண்; என்னால் போராட முடியும்’ என்ற கோஷத்தை வலுவாக முன்வைத்தனர். அதுவே அவருக்கு வெற்றியை ஈட்டித் தந்திருக்கிறது.