17 வருடங்களாக அதே குட்டிப் பிசாசு!

‘குட்டிப்பிசாசே, குட்டிப் பிசாசே...’ என மொத்த தமிழ் நாட்டையும் ஆட வைத்தவர், இப்படியும் நடிப்பாரா என அடுத்தடுத்து ‘பரதேசி’ மற்றும் ‘காவியத் தலைவன்’ படங்களில் நடனம், நடிப்பு என மனதைக் கொள்ளை கொண்டார். 

- ஷாலினி நியூட்டன்

இதோ சினிமா உலகில் கால் பதித்து வருடங்கள் 17 ஆகிவிட்டன. இன்றும் அதே அழகு, ஃபிட்டான நடிகை என வலம் வருகிறார் நடிகை வேதிகா.

இந்த வருடம் மட்டும் தென்னிந்திய மொழிகள் ஒவ்வொன்றிலும் குறைந்தது 2 படங்கள் வீதம் கைவசம் இருக்கும் நிலையில் தற்போது ‘யக்‌ஷினி’ மூலம் வெப் சீரீஸிலும் கால் பதித்துள்ளார்.

‘‘எனக்கு நடிப்பும், கேரக்டரும்தான் பிரதானம். அதற்கான காத்திருப்பும், காலமும் எப்பவும் நான் எடுத்துப்பேன்...’’ ஆரம்பமே பக்குவமான மனநிலையுடன் பேசத் துவங்கினார் வேதிகா.

இத்தனை வருடங்கள் நடிப்பு வாழ்க்கை என்ன கற்றுக்கொடுத்தது?

நான் நடிக்க வந்தாலும் இடையிலே படிப்புக்கான இடைவேளை எடுத்துக்கிட்டுதான் திரும்பவும் நடிக்க ஆரம்பிச்சேன். சினிமாவிற்குள் வந்த சில நாட்களிலேயே பாலா சார், வசந்தபாலன் என திறமையான இயக்குநர்கள் படங்களில் நடிக்கறதுக்கான வாய்ப்பு கிடைத்தது.

நமக்குக் கொடுக்கப்பட்ட வேலையை சரியாகச் செய்தாலே நமக்கான வாய்ப்பு நம்மைத் தேடிதானாக வரும் என்கிறதைக் கத்துக்கிட்டேன். மேலும் நானும் என்னை அதிகம் ப்ரமோட் செய்துக்க மாட்டேன். நடிக்கணும், சினிமாதான் எல்லாம்னு நினைச்சு வந்தேன். அதை முழுமையா செய்யணும்ன்னு கத்துக்கிட்டேன்.

`இந்த நம்பர் ஒன் நடிகைகள் பட்டியலில் எல்லாம் வர ஆசையில்லையா?

என்னுடைய கரியரை டான்ஸ், பாட்டு, ரொமான்ஸ் இப்படி ஒரு கமர்சியல் நடிகையாகத்தான் ஆரம்பிச்சேன். ஆனால், எனக்குள் இருக்கும் நடிகையை இயக்குநர்கள் பார்த்தாங்க.