തലകുനിച്ച് ബോളിവുഡ് തലയെടുപ്പോടെ ടോളിവുഡ്

സ്വന്തം കഥകളും അനുഭവങ്ങളും സിനിമയാക്കാൻ ആഗ്രഹിക്കുന്ന വർക്കുള്ള പ്രചോദനങ്ങളാണ് തെന്നിന്ത്യൻ സിനിമകൾ

ഹോളിവുഡ്ഡിൽ അഭിനയിക്കുക എന്നത് ഏതൊരു അഭിനേതാവിന്റെയും സ്വപ്നമാണ്. എന്നാൽ ഞാൻ ആഗ്രഹിക്കുന്നത് ഹോളിവുഡ് അല്ല. തെന്നിന്ത്യൻ സിനിമാലോകത്തെയാണ്. ബോളിവുഡിന്റെ പ്രിയപ്പെട്ട നടൻ സൽമാൻ ഖാന്റെ വാക്കുകളാണിത്. ലോകമെങ്ങും അറിയപ്പെടുന്ന രീതിയിൽ ഇന്ത്യൻ സിനിമ വൻനേട്ടം കൈവരിക്കണമെങ്കിൽ ഭാഷയുടെ മതിലുകൾ മറികടന്ന് സിനിമാമേഖല ഒറ്റക്കെട്ടായി നിൽക്കണമെന്ന് പറഞ്ഞുകൊണ്ടുള്ള സൽമാൻ ഖാന്റെ ഈ വാക്കുകൾ ബോളിവുഡ്ഡിനെ വിറപ്പിച്ചിരുന്നു. അതിന്റെ പ്രധാനകാരണം വളരെ ചുരുങ്ങിയ കാലം കൊണ്ടുള്ള തെന്നിന്ത്യൻ സിനിമയുടെ വളർച്ച തന്നെയാണ്. 2022 തെന്നിന്ത്യൻ സിനിമകളുടെ സുവർണ്ണകാലമായിരുന്നു. ടോളിവുഡ്ഡിൽ നിന്നും 2022 ൽ പുറത്തിറങ്ങിയ ഹിറ്റ് ചിത്രങ്ങൾ തെന്നിന്ത്യയുടെ പ്രൗഢിക്ക് മാറ്റു കൂട്ടി.

അതേസമയം 2022 അവസാനിക്കുമ്പോൾ ബോളിവുഡ് വലിയ പ്രതിസന്ധിയിലൂടെ കടന്നുപോവുന്ന ഒരു കാഴ്ചയാണ് നമ്മൾ കണ്ടത്. ഈ സമയത്താണ് സൽമാൻ ഖാന്റെ വാക്കുകൾക്ക് പ്രസക്തിയേറുന്നത്. ദക്ഷിണേന്ത്യൻ സിനിമാരംഗം ഞെട്ടിക്കുന്ന പ്രമേയങ്ങളും സ്റ്റൈലൻ മേക്കിംഗും പരീക്ഷിക്കുമ്പോൾ ഇന്ത്യൻ സിനിമയിൽ ബോളിവുഡിലെ അതികായന്മാർ ഞെട്ടുന്നുണ്ട് എന്നത് സത്യമാണ്. മുംബൈ നഗരത്തിൽ നിന്ന് സിനിമാവ്യവസായം അടർന്നുമാറുന്നു എന്നത് ബോളിവുഡിനെ അങ്കലാപ്പിലാക്കിയിരിക്കുന്നു.

കോവിഡ് മഹാമാരി സിനിമാവ്യവസായത്തെ പിടിചുലച്ചപ്പോഴും മറ്റെല്ലാ മേഖലകളും സാമ്പത്തികമായി തകർന്നിരുന്നു. സിനിമാവ്യവസായം പ്രതിസന്ധിയിലാകുന്ന ആദ്യവർഷമല്ല 2022. മുൻവർഷങ്ങളിലെ കണക്കെടുത്തുനോക്കുമ്പോൾ തെന്നിന്ത്യൻ സിനിമാലോകം പ്രതിസന്ധികളെ മറികടന്ന വർഷമായിരുന്നു ഇത്. 2022 ൽ ടോളിവുഡിൽ നിന്നും പുറത്തിറങ്ങിയ ബിഗ് ബഡ്ജറ്റ് ചിത്രങ്ങളുടെ പട്ടികയും വലുതാണ്. അങ്ങനെയുള്ള മികച്ച ചിത്രങ്ങളിൽ ഒന്നായിരുന്നു ആർ.ആർ.ആർ. ജൂനിയർ എൻ.ടി.ആർ, രാംചരൺ, ആലിയഭട്ട്, അജയ്ദേവ്ഗൺ എന്നിവർ അഭിനയിച്ച ആർ.ആർ.ടോളിവുഡ് സിനിമാവ്യവസായത്തിന് വലിയ ഖ്യാതി നേടി ക്കൊടുത്തു. 1200 കോടിയാണ് ചിത്രത്തിന്റെ ബോസോഫീസ് നേട്ടം. ബോക്സോഫീസ് റെക്കോർഡുകൾ തകർക്കാൻ ചിത്രത്തിന് ചുരുങ്ങിയ നാളുകൾ കൊണ്ടുതന്നെ സാധിച്ചു.