മാർക്കറ്റിംഗ് വേറെ; നിർമ്മാണം വേണ സിനിമാ മാർക്കറ്റിംഗിൽ നിന്ന് നിർമ്മാതാവിന്റെ കുപ്പായമണിഞ്ഞ് സംഗീതജനാർദ്ദനൻ

അപ്രതീക്ഷിതമായി എത്തിപ്പെടുന്ന ഒരിടത്ത് സ്വന്തം വ്യക്തിമുദ്ര പതിപ്പിക്കുക എന്നത് അത്ര എളുപ്പമുള്ള കാര്യമല്ല. സിനിമാ മാർക്കറ്റിംഗ് മേഖലയിൽ പേര് എഴുതിച്ചേർത്ത് ഇതാ ഇപ്പോൾ മലയാള സിനിമയിൽ ഒരു നിർമ്മാതാവിന്റെ റോളിൽ ആത്മ വിശ്വാസത്തോടെ ചുവട് വയ്ക്കുകയാണ് ഡോ.സംഗീത ജനാർദ്ദനൻ. സംഗീതയുടെ മനസ്സിൽ ആശയങ്ങളേറെയുണ്ട്. വ്യക്തതയുള്ള കാഴ്ചപ്പാടുകൾ ഓരോ വാക്കിലുമുണ്ട്. കണ്ടതും മനസ്സിലാക്കിയതും മനസ്സിലുള്ളതുമായ സിനിമയെക്കുറിച്ച് സംഗീത സംസാരിക്കുന്നു.

- ബിന്ദു പി.പി

മനോജ് പിള്ള എന്ന സുഹൃത്ത് വഴിയാണ് അശ്വനി തിവാരിയെ പരിചയപ്പെടുന്നത്. മനോജാണ് ഞാനും അശ്വനിയും തമ്മിൽ സ്വഭാവത്തിൽ സാമ്യമുണ്ടെന്നും ഞങ്ങൾ സംസാരിക്കണമെന്നും പറഞ്ഞത്. അങ്ങനെ വളരെ യാദൃച്ഛികമായാണ് ഞാനും അശ്വനിയും കണ്ടുമുട്ടുന്നത്. ആദ്യം ഹിന്ദിയിൽ നിന്ന് മലയാളത്തിലേക്ക് ഒരു ചിത്രം മൊഴിമാറ്റുന്നതിനെക്കുറിച്ചായിരുന്നു സംസാരിച്ചത്. എന്നാൽ ഞങ്ങളുടെ കണക്ഷൻ വർക്ക് ആയതുകൊണ്ടാവാം അശ്വനി പറഞ്ഞു, നമുക്ക് മൊഴിമാറ്റ സിനിമ വേണ്ട, നമുക്കൊരുമിച്ച് ഒരു സിനിമ നിർമ്മിക്കാമെന്ന്. അത് എനിക്കും സർപ്രൈസ് ആയിരുന്നു. മലയാളസിനിമയിൽ നിന്നാണ് വന്നതെന്ന് പുറത്ത് ഏതൊരു ഇൻഡസ്ട്രിയിൽ പറഞ്ഞാലും വലിയ ബഹുമാനം അവർ നമ്മളോട് കാണിക്കും. അത് നമ്മുടെ ഇവിടുത്ത സിനിമകളുടെ ക്വാളിറ്റി തന്നെയാണ്. അത്ര നല്ല കണ്ടന്റുള്ള സിനിമകൾ ഇവിടെ സംഭവിക്കുന്നുണ്ട്. അതിൽ അഭിമാനവും സന്തോഷവുമുണ്ട്.

ആദ്യസിനിമ സംഭവിക്കുന്നു