കാസർഗോട്ടേയ്ക്ക് ചേക്കേറിയ മലയാളസിനിമ

മലയാള സിനിമ കാസർകോട്ടേയ്ക്ക് ചിറക് വിരിക്കുകയാണ്. ആൻഡ്രോയിഡ് കുഞ്ഞപ്പൻ, തിങ്കളാഴ്ച നിശ്ചയം, ന്നാ താൻ കേസ് കൊട് തുടങ്ങിയ ചിത്രങ്ങളൊക്കെ കാസർഗോഡിന്റെ ചൂടും ചൂരുമുള്ളവയായിരുന്നു. കാസർഗോഡ് നിന്നും നിരവധി അഭിനേതാക്കളാണ് ഇപ്പോൾ മലയാളസിനിമയിലേയ്ക്ക് കടന്നുവരുന്നത്. മദനോത്സവത്തിലെ പോരാളി ബിനു എന്ന ശക്തമായ കഥാപാത്രത്തിലൂടെ ശ്രദ്ധേയനായ രാജേഷ് അഴീക്കോടൻ നാനയുമായി തന്റെ സിനിമാ വിശേഷങ്ങൾ പങ്കുവയ്ക്കുന്നു.

- പി.ജി.എസ് സൂരജ്

മദനോത്സവം ബളാലിന്റെ സ്വന്തം സിനിമയാണോ? മദനോത്സവത്തിന്റെ സംവിധായകൻ സുധീഷ് ഗോപിനാഥ് എന്റെ നാട്ടുകാരനും സുഹൃത്തുമാണ്. പയ്യന്നൂരിലെ എന്റെ നാടക സംഘത്തിൽപ്പെട്ട ആളുകൂടിയായിരുന്നു. വർഷങ്ങളായി മലയാളസിനിമയിൽ അസോസിയേറ്റ് ഡയറക്ടർ ആയി സുധീഷ് ജോലി ചെയ്യുന്നുണ്ട്. സുധീഷ് ചീഫ് അസോസിയേറ്റ് ആയി വർക്ക് ചെയ്ത ജിന്ന്, നാ താൻ കേസ് കൊട് തുടങ്ങിയ സിനിമകളിലൊക്കെ ഞാൻ അഭിനയിക്കുന്നതും സുധീഷുമായുള്ള സൗഹൃദത്തിന്റെ ഭാഗമായിരുന്നു. സംവിധായകൻ രതീഷ് പൊതുവാളിനെ എനിക്ക് പരിചയപ്പെടുത്തുന്നതും സുധീഷ് ആയിരുന്നു. നാ താൻ കേസ് കൊട് എന്ന ചിത്രത്തിൽ എം.എൽ.എയുടെ പി.എ ആയ ചന്ദ്രൻ എന്ന കഥാപാത്രത്തെയായിരുന്നു ഞാൻ അവതരിപ്പിച്ചത്. അങ്ങനെയായിരുന്നു ഞാൻ രതീഷ് പൊതുവാളിന്റെ ടീമിലേക്ക് എത്തുന്നത്. മദനോത്സവത്തിന്റെ ലൊക്കേഷൻ എന്റെ നാടായ കാഞ്ഞങ്ങാട്, ബളാൽ ആയാൽ നന്നാവില്ലേ എന്ന് സുധീഷ് ചോദിച്ചു. കേട്ട പാടെ തന്നെ പൂർണ്ണമായി ആ തീരുമാനത്തെ ഞാൻ പിന്തുണച്ചു. കാരണം കാസർകോഡ് വച്ച് പൊതുവേ സിനിമാ ചിത്രീകരണങ്ങൾ അങ്ങനെ ഉണ്ടാവാറില്ല. നമ്മുടെ നാട്ടിൽ വച്ചുള്ള ചിത്രീകരണമാകുമ്പോൾ കൂടുതൽ നന്നായി തന്നെ സിനിമയിൽ സഹകരിക്കാൻ കഴിയുമല്ലോ. സിനിമയിൽ കാണിച്ചിരിക്കുന്ന മദനന്റെ വീട്, പാർട്ടി ഓഫീസ് എല്ലാം ചിത്രീകരിച്ചിരിക്കുന്നത് ബളാൽ എന്ന എന്റെ ഗ്രാമത്തിൽ വച്ചാണ്.