സിനിമയോളം വളർന്ന സംവിധായകൻ

പ്രേക്ഷകന്റെ അഭിരുചികളെ മാറ്റിമറിച്ച ഹിറ്റ്മേക്കറായിരുന്നു ഐ.വി.ശശി

- മധു

ഇരുപ്പം വീട്ടിൽ ശശിധരൻ എന്ന ഐ. വി. ശശിയെ അറിഞ്ഞു തുടങ്ങിയത് എന്നു മുതലാണെന്ന് കൃത്യമായി പറയാനാവില്ലെങ്കിലും അദ്ദേഹത്തിന്റെ ആദ്യചിത്രമായ 'ഉത്സവം'മുതൽ ആ പേര് ഞാൻ ശ്രദ്ധിച്ചു തുടങ്ങിയിരുന്നു. അതിനുമുൻപ് സിനിമാലൊക്കേഷനിലോ സ്റ്റുഡിയോകളിലോ വെച്ച് ഞങ്ങൾ കണ്ടുമുട്ടിയിരിക്കാം. പക്ഷേ, ഐ. വി. ശശി എന്ന സംവിധായക പ്രതിഭയെപോലെ ശശി എന്ന മനുഷ്യനെയും എന്നും ഹൃദയത്തിൽ ചേർത്തു വെച്ചിരുന്നു. സിനിമയ്ക്കപ്പുറം ഞങ്ങളുടെ സൗഹൃദം അങ്ങനെയായിരുന്നു.

വ്യക്തിജീവിതത്തിലെ പല കാര്യങ്ങളും മൂത്ത ഒരു സഹോദരനോടെന്ന പോലെ എന്നോട് തുറന്നുപറയാൻ ശശി ഒട്ടും മടി കാണിച്ചിരുന്നില്ല. എന്നിട്ടും എന്തൊക്കെയോ പറയാൻ ബാക്കി വെച്ചപോലെയായിരുന്നു അദ്ദേഹം വിട വാങ്ങിയത്. ആ വേർപാട് മലയാളസിനിമയ്ക്കുണ്ടായ കനത്ത നഷ്ടം പോലെ വ്യക്തിപരമായി എന്നെയും വേദനിപ്പിച്ചിട്ടുണ്ട്. പുതിയ കാലത്തെ പല സിനിമകളും കാണുമ്പോൾ അറിയാതെ ശശിയെ ഓർത്തുപോകും.

ഇന്നത്തെപോലെ വികസിച്ചിട്ടില്ലാൽ, സാങ്കേതികവിദ്യകളുടെ വലിയ പരിമിതികൾക്കുള്ളിൽ നിന്നാണ് ഐ. വി. ശശിയിലെ സംവിധായകൻ അത്ഭുതങ്ങൾ സൃഷ്ടിച്ചത്.ആ കാലത്തേക്കൂടി തിരിച്ചറിഞ്ഞുവേണം ശശിയുടെ സംഭാവനകളെ വിലയിരുത്താൻ അത്തരമൊരു വിലയിരുത്തൽ നടത്തുമ്പോൾ മാത്രമേ യഥാർത്ഥത്തിൽ ഐ. വി. ശശി എന്തായിരുന്നുവെന്നും ആരായിരുന്നുവെന്നും നമ്മൾക്ക് മനസ്സിലാക്കാനാവൂ.

ഏതാണ്ട് മുപ്പത്തിയഞ്ച് വർഷത്തോളം നീണ്ട ശശിയുടെ ചലച്ചിത്ര ജീവിതത്തിന്റെ ഭാഗമായി അദ്ദേഹത്തിന്റെ കുറെയേറെ സിനിമകളിൽ ചെറുതും വലുതുമായ വേഷങ്ങളിൽ എനിക്കും അഭിനയിക്കാൻ കഴിഞ്ഞിട്ടുണ്ട്. ആ അനുഭവത്തിൽ നിന്നുമാത്രമല്ല, ഒരു പ്രേക്ഷകനെന്ന നിലയിലും അദ്ദേഹത്തിന്റെ മറ്റുപല ചിത്രങ്ങളിലൂടെയും കടന്നുപോയ ഒരാളെന്ന നിലയിലും ഞാൻ കണ്ട അസാമാന്യ പ്രതിഭകളിലൊരാളായിരുന്നു ശശി. തന്റെ ഓരോ ഫ്രെയിമിനും തന്റെതായ മുദ്രപതിപ്പിക്കാൻ ശശി എപ്പോഴും ശ്രമിച്ചിരുന്നു. അതുകൊണ്ടു തന്നെയാണ് ശശിയുടെ സിനിമകൾ അടിമുടി വ്യത്യസ്തമായതും പ്രേക്ഷകർ അവയെ ആഘോഷപൂർവം കൊണ്ടാടിയതും.