പെട്ടി തുറന്നാൽ വരുമാന മധുരം

തേൻവിൽപനയിൽനിന്നു തേൻ ടൂറിസമെന്ന ആശയത്തിലേക്കു വളരുകയാണ് കുമളിയിലെ ഫിലിപ്സ് നാച്ചുറൽ ഹണി

ഹൈറേഞ്ചിലെ കാട്ടുപൂക്കളിലും മറ്റും ഒളിഞ്ഞിരിക്കുന്ന ഓരോ തുള്ളി തേനും ശേഖരിച്ചു വിൽക്കുന്ന സംരംഭം ഇടുക്കി കുമളിയിലെ ഫിലിപ്സ് നാച്ചുറൽ ഹണിയെ അങ്ങനെ വിശേഷിപ്പിക്കാം. വർഷം തോറും അരലക്ഷം ലീറ്റർ തേൻ ശേഖരിച്ച് നാട്ടുകാർക്കു നൽകുന്നു കുമളി വട്ടം തൊട്ടിയിൽ ഫിലിപ് മാത്യു. ആറായിരത്തോളം തേനീച്ചക്കോളനികളും അവ യോരോന്നിലും തേൻ ശേഖരിക്കുന്ന ലക്ഷക്കണക്കിനു തേനീച്ചത്തൊഴിലാളികളുമുള്ള ബിസിനസ് സാമ്രാജ്യമാണ് ഫിലിപ്പിന്റേത്. ചെറുകിട കൃഷിയിടങ്ങളിലും എസ്റ്റേറ്റുകളിലും പൂന്തോട്ടങ്ങളിലും കുറ്റിക്കാടുകളിലുമൊക്കെയുള്ള ചെറുതും വലുതുമായ ചെടികളുടെ പൂക്കളിലെ തേൻ ഹൈറേഞ്ചിന്റെ പല ഭാഗങ്ങളിലായി വച്ചിട്ടുള്ള തേനീച്ച പ്പെട്ടികളിൽ ശേഖരിക്കപ്പെടുന്നു.