શક્કરટેટી : સમૃદ્ધિની બેટી

> આગવી કોઠાસૂઝ અને બાગાયત વિભાગના માર્ગદર્શન દ્વારા શક્કરટેટીનું મબલક ઉત્પાદન મેળવતા હરિભાઈ > પ્લાસ્ટિક મલ્ટિંગ અને ગલગોટાના આંતરપાક દ્વારા મેળવી બમણી આવક > પરંપરાગત ખેતીની સાથોસાથ બાગાયત પાકોમાં મહારથ હાંસલ કરતા માંડલ - દેત્રોજના પ્રગતિશીલ ખેડૂતો > આયોજનપૂર્વક બાગાયતી ખેતી કરવામાં આવે તો સારાં બજારભાવ મળી રહેતા હોય છેઃ- હરિભાઇ પાવરા > અન્ય રાજ્યોના વેપારીઓ સીધા ખેતરમાંથી જ શક્કરટેટીની ખરીદી કરી જાય છે:- હરિભાઈ પાવરા

અમદાવાદના માંડલ અને દેત્રોજ તાલુકાના ખેડૂતો કૃષિક્ષેત્રે તેમના પ્રયોગાત્મક અભિગમ માટે જાણીતા છે. આવા જ એક ખેડૂત છે માંડલ તાલુકાના વરમોર ગામના હરિભાઈ પાવરા.

વર્ષોથી કપાસ અને દિવેલાની પરંપરાગત ખેતી કરતા હરિભાઈ છેલ્લાં ત્રણેક વર્ષથી પાક ફેરબદલી અને યોગ્ય આયોજન દ્વારા ટૂંકા બાગાયતી પાકોના ગાળાના વાવેતર થકી ઓછા ખર્ચે વધુ વાવેતર અને વધુ ઉત્પાદન મેળવી રહ્યા છે. તેઓ બાગાયતી પાકોમાં મુખ્યત્વે દાડમ, શક્કરટેટી, તરબૂચ અને શાકભાજીના પાકો લે છે.

શક્કરટેટી એ ઉનાળુ પાક છે, જેમાં પાક તૈયાર થવામાં 70થી 90 દિવસ જેટલો સમય લાગતો હોય છે. ટેટીની ખેતીમાં ઓછા પાણીની જરૂરિયાત હોવાથી પાણીની અછત હોય તેવા વિસ્તારમાં આ પાક વધુ લેવાતો હોય છે. ટેટીમાં લગભગ 80 થી 90 ટકા જેટલો પાણીનો ભાગ હોવાથી ઉનાળાની કાળઝાળ ગરમીમાં માર્કેટમાં તેની ડિમાન્ડ વધુ જોવા મળે છે.