വയറിങ്ങിൽ പ്രത്യേക ശ്രദ്ധ വേണം

വീട്ടിൽ വയറിങ്ങ് നടത്തുന്നതിനു മുമ്പ് ചില കാര്യങ്ങൾ ശ്രദ്ധിച്ചാൽ അനാവശ്യചെലവുകൾ കുറയ്ക്കാം, അപകടങ്ങളും ഒഴിവാക്കാം.

വയറിങ്ങിലെ അപാകതകൾ കാരണമുള്ള അപകടങ്ങൾ നമ്മുടെ നാട്ടിൽ സാധാരണമാണ്. അതുപോലെ തന്നെ, പ്രതീക്ഷിക്കാത്ത തരത്തിലുള്ള ചെലവുകളും. അതുകൊണ്ട് വീട്ടിൽ വയറിങ്ങ് നടത്തുന്നതിനു മുമ്പ് ചില കാര്യങ്ങൾ ശ്രദ്ധിച്ചാൽ അനാവശ്യചെലവുകൾ കുറയ്ക്കാം, അപകടങ്ങളും ഒഴിവാക്കാം.

സാധാരണഗതിയിൽ വീടിന്റെ മേൽക്കൂര വാർക്കുന്ന സമയത്താണ് വയറിങ്ങ് പണികൾ തുടങ്ങിയിരുന്നത്. എന്നാൽ, വയറിങ്ങിനു മുമ്പു തന്നെ ഇതുമായി ബന്ധപ്പെട്ട് വാങ്ങാനുദ്ദേശിക്കുന്ന വയർ, ബൾബുകൾ, സ്വിച്ചുകൾ, ഇലക്ട്രിക് ഉപകരണങ്ങൾ തുടങ്ങിയ സാധനസാമഗ്രികളെക്കുറിച്ച് നിശ്ചയം ഉണ്ടായിരിക്കണം. അതുപോലെ തന്നെ ലൈറ്റ് പോയിന്റുകൾ എവിടെയൊക്കെ എന്നതിനെക്കുറിച്ചും മുൻകൂട്ടി നിശ്ചയിക്കാൻ കഴിഞ്ഞാൽ വാർക്കുമ്പോൾ തന്നെ അതിനനുസരിച്ചുള്ള പൈപ്പുകൾ കോൺക്രീറ്റിലൂടെ ഇട്ടു പോകാം. മുൻകാലങ്ങളിൽ ഫാനുകൾക്കുള്ള പൈപ്പുകളാണ് ഇത്തരത്തിൽ കോൺക്രീറ്റിനുള്ളിലൂടെ കടത്തിവച്ചിരുന്നതെങ്കിൽ, ഇന്ന് സർക്യൂട്ട് പൈപ്പുകളും പരമാവധി കോൺക്രീറ്റിനുള്ളിലൂടെ തന്നെ നൽകുന്ന രീതിയാണുള്ളത്.

തേപ്പ് വേണ്ടാത്ത ചുവരുകൾക്ക് പുറത്തു കൂടിയാണ് വയറിങ്ങ് നൽകുന്നത്. 1/2 ഇഞ്ച് മുതൽ പല വലിപ്പത്തിലുള്ള പരന്ന പിവിസി പൈപ്പുകളാണ് ഇത്തരത്തിൽ ചുവരുകൾക്കു മീതേകൂടിയുള്ള വയറിങ്ങിനായി ഉപയോഗിച്ചു വരുന്നത്. മിക്ക ആധുനിക വീടുകളുടെയും വയറിങ്ങിന്റെ ഡ്രോയിങ്ങും ആർക്കിട്ടെക്റ്റ് തന്നെ നൽകിവരുന്നുണ്ട്. അതിനനുസരിച്ച് വയറിങ്ങിനായി പരിചയസമ്പന്നനായ ഇലക്ട്രീഷ്യനെ ചുമതലപ്പെടുത്തുന്നതോടൊപ്പം നിങ്ങളുടെ ഇഷ്ടാനിഷ്ടങ്ങൾ കൂടി പരിഗണിക്കുകയും വേണം.

ക്വട്ടേഷൻ

വയറിങ്ങ് കരാർ ജോലിക്കാരെ ഏൽപ്പിക്കുന്ന കാലമാ ണല്ലോ. പണികൾ തുടങ്ങും മുമ്പ് സാധനങ്ങളുടെ ഇനം തിരിച്ചുള്ള വിവരങ്ങളും റേറ്റും ലേബർ ചാർജ്ജും അടങ്ങുന്ന ക്വട്ടേഷൻ തയ്യാറാക്കിത്തരാൻ ഇലക്ട്രീഷ്യനോട് ആവശ്യപ്പെടുന്നത് നല്ലതാണ്. സാധാരണഗതിയിൽ പണി തീരുമ്പോൾ ഇലക്ട്രീഷ്യൻ നൽകുന്ന നീണ്ട ബിൽ പലപ്പോഴും വാക്കു തർക്കങ്ങൾക്കിടയാക്കാറുണ്ട്. ക്വട്ടേഷൻ വാങ്ങിവച്ചാൽ ഇത്തരത്തിലുള്ള തർക്കങ്ങൾ ഒഴിവാക്കാം. പണി കൂലി, സാധനങ്ങളുടെ വില, ജോലിക്കൂലി തുടങ്ങിയ ഇനത്തിൽ എത്ര തുക മാറ്റിവയ്ക്കണമെന്നൊക്കെ മുൻകൂട്ടി മനസ്സിലാക്കാനും സാധിക്കും. വിവിധ കരാറുകാരിൽ നിന്ന് ക്വട്ടേഷൻ വാങ്ങി കുറഞ്ഞ കൂലിക്ക് പണികൾ ഏൽപ്പിക്കുന്നത് പോക്കറ്റു കാലിയാവാതിരിക്കാൻ നല്ലതാണ്.