அழகிய தமிழ் மகள்!

சென்னை மயிலாப்பூர், ஓய்வு பெற்ற தாசில்தார் குருமூர்த்தியின் வீடு அவருக்கு வயது எழுபதை தாண்டியிருந்த போதிலும் சுறு சுறுப்பாக இருந்தார். அதிகாலையில் முன் கூடத்தில் இருந்த ஊஞ்சலில் அமர்ந்து மனைவி தந்த பில்டர் காபியை ரசித்து குடித்து முடித்தவர், மனைவி ஆண்டாளிடம் “உன் கை மணமே தனி தான்

- பிரேமா ரத்தினவேல்

கல்யாணமான போது நீ போட்ட அன்றைய காபியின் சுவை இன்றளவும் மாறவில்லை” என பெருமையாக பேச, ஆண்டாள், அந்த வயதிலும் லேசான வெட்கத்துடன், "போங்கண்ணா நீங்களும், அதே மாதிரி சொல்லிட்டே இருக்கேள்!" என்றவர். “நம்ம பையன் கேசவனுக்கு, அடுத்த வாரம் பிறந்த நாள் வருது வழக்கம் போல கோவிலுக்கு அன்னதானம் பண்ண மறக்காது பணம் கொடுத்துடுங்க. வேறு யாரேனும், அந்த தேதியில் பண்ணிடப்போறாங்க" என்று சொல்ல, 'உம், கொடுக்கறேன்! நாம தான் வருடா வருடம் செய்றோமே! மறக்குமா" என்றவர். பெருமூச்சு விட்டார்.

"என்ன பண்றது? பெத்த மனம் கேட்க மாட்டேங்குது! அவன், கோச்சுண்டு போய் வருடம் இருபது ஆச்சு! எங்கே, எப்படி இருக்கானோ? குழந்தை, குட்டி இருக்கோ? எதுவும் தெரியலை. குழந்தை எங்கே இருந்தாலும் ஷேமமா இருக்கணும்! இருப்பான், நாம் வணங்குகிற கடவுள் அருள் புரிவார்!" என்று சொல்லும் போதே கண்கள் கலங்கியது.