'മെഡിസെഫ്: പെരുവഴിയിലാക്കരുത് പെൻഷൻകാരെയും ജീവനക്കാരെയും

2025 ജൂണിൽ കരാർ കാലാവധി അവസാനിക്കാനിരിക്കെ പദ്ധതി പുതുക്കാനുള്ള നടപടികൾപോലും ആരംഭിച്ചിട്ടില്ല.

- ബാലകൃഷ്ണൻ തൃക്കങ്ങോട് ധനകാര്യ നിരീക്ഷകനും റിട്ട. പ്രധാന അധ്യാപകനുമാണ് ലേഖകൻ

സംസ്ഥാന ജീവനക്കാരുടെയും പെൻഷൻകാരുടെയും ആരോഗ്യ സുരക്ഷാ പദ്ധതിയായ മെഡിസെപ്പ് ഉടൻ അവസാനിപ്പിക്കുമോ? ലക്ഷക്കണക്കിനു പേർ ഇപ്പോൾ ആശങ്കയിലാണ്. സർക്കാരിനും ജനങ്ങൾക്കും വേണ്ടി ഇപ്പോൾ ജോലി ചെയ്യുന്നവരെയും വർഷങ്ങളോളം പണിയെടുത്ത് ജീവിതസായാഹ്നത്തിലെത്തിയവരെയും സർക്കാർ അരക്ഷിതാവസ്ഥയിലേക്കു തള്ളിവിടില്ലെന്ന് ഇവരിൽ ഭൂരിഭാഗംപേരും പ്രതീക്ഷിക്കുന്നു. അതേസമയം 2025 ജൂൺ 30ന് അവസാനിക്കുന്ന കരാർ പുതുക്കാനുള്ള നടപടികളൊന്നും ആരംഭിച്ചിട്ടില്ലെന്നത് ആശങ്ക സൃഷ്ടിക്കുന്നതാണ്. ജീവനക്കാർക്കുള്ള കടുത്ത അസംതൃപ്തി പാർലമെന്റ് തിരഞ്ഞെടുപ്പിൽ തിരിച്ചടി യായെന്ന തിരിച്ചറിവിൽ സർക്കാർ ഇനി കാര്യങ്ങൾ വേഗത്തിലാക്കും എന്ന പ്രതീക്ഷയാണ് ഇപ്പോഴുള്ളത്.

പരാതിപ്രളയത്തിന്റെ രണ്ടു വർഷം

ജീവനക്കാരും പെൻഷൻകാരും ആശ്രിതരും ഉൾപ്പെടെ 30 ലക്ഷത്തോളം ഉപഭോക്താക്കളുമായി 2022 ജൂലൈയിൽ ആരംഭിച്ച മെഡിസെപ്പ് പദ്ധതിയിൽ പരാതി ഒഴിഞ്ഞ സമയം ഉണ്ടായിട്ടില്ല. തുടക്കത്തിലെ ബാലാരിഷ്ടത മാത്രമാണ് അതെന്നായിരുന്നു ധനമന്ത്രിയുടെ നിലപാട്. പക്ഷേ, രണ്ടു വയസ്സു കഴിഞ്ഞിട്ടും പരാതിപ്പെരുമഴ നിലച്ചില്ലെന്നു മാത്രമല്ല വൻതോതിൽ കൂടുകയുമാണ്.

ആശുപത്രികളുടെ തീവെട്ടിക്കൊള്ള, മെച്ചപ്പെട്ട ആശുപത്രികൾ ലിസ്റ്റിലില്ല, ആശുപ്രതികൾ വേണ്ടത്ര ചികിത്സാ സൗകര്യങ്ങൾ ഉറപ്പാക്കുന്നില്ല, എല്ലാ അസുഖങ്ങൾക്കും ചികിത്സ നൽകുന്നില്ല, ബിൽ പെരുപ്പിച്ചു കാണിച്ചു പിഴിയുന്നു, ക്ലെയിം അനുവദിക്കാൻ കാലതാമസം എടുക്കുന്നു...എന്നിങ്ങനെ പരാതികൾ പലതാണ് കാഷ്‌ലെസ്സ് പദ്ധതിയാണെങ്കിലും ഈ സൗകര്യം ഇപ്പോൾ കടലാസിൽ മാത്രമാണത്രേ. മിക്ക ആശുപത്രികളും കാഷ്‌ലെസ്സ് ചികിത്സ അനുവദിക്കുന്നില്ല. ബിൽ തുക കൂട്ടി കൊള്ളയടിക്കുന്ന ആശുപത്രികൾക്കെതിരെ നടപടികളില്ലെന്നും പദ്ധതി പൊളിക്കാൻ സ്വകാര്യ ഇൻഷുറൻസ് കമ്പനികൾ രംഗത്തുണ്ടെന്നും ആരോപണമുണ്ട്.

കമ്പനിക്ക് നഷ്ടക്കച്ചവടം