മനസ്സ് പിടിവിടുന്നുണ്ടോ?

തലച്ചോറിന്റെ പ്രവർത്തനങ്ങളുടെ ആകത്തുകയാണ് മനസ്സ്. അതിനാൽ, മാനസികാരോഗ്യം നിലനിർത്താൻ പൊതുവായുള്ള ശാരീരികാരോഗ്യം മെച്ചമായി നിലനിർത്തേണ്ടതും അത്യാവശ്വമാണ്

- ഡോ. അരുൺ ബി. നായർ Professor of Psychiatry. Medical College Trivandrum. Honorary Consultant Psychiatrist, Sree Chitra Tirunal Institute for Medical Sciences, Trivandrum. arunb.nair@yahoo.​com

എന്താണ് മനസ്സ്?' എന്നത് നൂറ്റാണ്ടുകളായി മനുഷ്യനെ കുഴക്കിയ ചോദ്യമാണ്. വിവിധ കാലഘട്ടങ്ങളിൽ വിവിധ വിശദീകരണങ്ങൾ ഇതിനുത്തരമായി വന്നിരുന്നു. മനസ്സ് ഹൃദയത്തിലാണെന്നും കരളിലാണെന്നും ശരീരത്തിന് പുറത്തുള്ള എന്തോ ആണെന്നും മറ്റുമുള്ള വിശദീകരണങ്ങളും വന്നു. എന്നാൽ, ആധുനിക ശാസ്ത്ര ലോകം മനസ്സിലാക്കിയിരിക്കുന്നത് 'തലച്ചോറിന്റെ പ്രവർത്തനങ്ങളുടെ ആകത്തുകയാണ് മനസ്സ്' എന്നതാണ്. മനസ്സിന്റെ ധർമങ്ങളായ ചിന്തകളും ഓർമകളും വികാരങ്ങളുമൊക്കെ നിയന്ത്രിക്കുന്നത് തലച്ചോറിന്റെ വിവിധ ഭാഗങ്ങൾ തന്നെയാണ്.

തലച്ചോറിലെ കോശങ്ങൾ തമ്മിലുള്ള വിടവിൽ ചില രാസവസ്തുക്കൾ നിലനിൽക്കുന്നുണ്ട്. ഇവയെ ശാസ്ത്രനാമത്തിൽ 'നാഡീ പ്രക്ഷേപിണികൾ (neurotransmitters) എന്നാണ് വിളിക്കുന്നത്. ഇവയുടെ സഹായത്തോടെയാണ് ഓർമകളും വികാരങ്ങളുമൊക്കെ വൈദ്യുതി തരംഗങ്ങളുടെ രൂപത്തിൽ ഒരു മസ്തിഷ്ക കോശത്തിൽ നിന്ന് മറ്റൊന്നിലേക്ക് പ്രസരിക്കുന്നത്. ഈ രാസവസ്തുക്കളുടെ അളവിലെ വ്യത്യാസമാണ് വിവിധ മാനസിക പ്രശ്നങ്ങൾക്കും പെരുമാറ്റ വൈകല്യങ്ങൾക്കും കാരണമാകുന്നത്.

മാനസികാരോഗ്യം എങ്ങനെ തിരിച്ചറിയാം?

സ്വന്തം കാര്യങ്ങൾ ഫലപ്രദമായി നിർവഹിക്കാനും മറ്റുള്ളവരോട് ആരോഗ്യകരമായ രീതിയിൽ ഇടപെടാനും ജോലി ചെയ്ത് ഉപജീവനം നടത്താനും സാധിക്കുന്ന ഏതൊരു വ്യക്തിക്കും മാനസികാരോഗ്യമുണ്ടന്ന് പ്രഥമദൃഷ്ട്യാ പറയാം. മാനസികാരോഗ്യമുള്ള വ്യക്തിക്ക് സ്വന്തം വികാരങ്ങളെ നിയന്ത്രിക്കാൻ സാധാരണഗതിയിൽ സാധിക്കും. സ്വന്തം ജീവിതത്തിൽ ആവശ്യമായ കാര്യങ്ങൾ എന്തൊക്കെയെന്ന് കൃത്യമായി നിർണയിച്ച് അതിനു വേണ്ട പരിശ്രമങ്ങൾ നടത്താൻ സാധിക്കും.

ചുറ്റുമുള്ള അഭ്യുദയകാംക്ഷികളെ തിരിച്ചറിയാനും അവരുടെ താല്പര്യങ്ങൾകൂടി സംരക്ഷിക്കുന്ന രീതിയിൽ പ്രവർത്തിക്കാനും കഴിയും. ആരോഗ്യകരമായ വ്യക്തിബന്ധങ്ങൾ സ്ഥാപിക്കാനും നിലനിർത്താന്നും ഇത്തരക്കാർക്ക് പ്രയാസമുണ്ടാകില്ല. താൻ ആഗ്രഹിക്കുന്ന കാര്യങ്ങൾ ചെയ്യാനും ഉപജീവനത്തിനുവേണ്ട മാർഗങ്ങൾ സ്വതന്ത്രമായി സ്വീകരിക്കാനും സാധിക്കാറുണ്ട്.

എന്താണ് മനോരോഗം?