રોમિના પૌરમોખ્તરીઃ સ્વીડનનાં નવા જળવાયુ મંત્રી

પર્યાવરણીય જાળવણીની જાગૃતિ ફેલાવવામાં સ્વીડન મહત્ત્વની ભૂમિકા ભજવી રહ્યું છે. વિશ્વના ટોચના સાઠ દેશોની યાદીમાં પર્યાવરણીય સંરક્ષણ પરફોર્મન્સ રેન્કિંગમાં સ્વીડન બીજા સ્થાને છે. એ સ્વીડનમાં હવે ક્લાઇમેટ મિનિસ્ટ્રી એટલે કે જળવાયુ મંત્રાલયનો પદભાર ૨૬ વર્ષીય રોમિના પૌરમોખ્તરી નામનાં યુવા નેતાને સોંપવામાં આવ્યો છે.

ભારતે થોડા દિવસો પહેલાં પર્યાવરણ સંરક્ષણને લઈને એક સરસ મિશનનો શુભારંભ કર્યો. આ મિશનનું નામ મિશન લાઇફ. મિશન લાઇફ અંતર્ગત પર્યાવરણ સંરક્ષણના સક્ષમ પ્રયાસો પર ભાર મૂકવાની વાત કરવામાં આવી છે. મનુષ્યો એટલે કે આપણે આપણી જીવનશૈલીમાં કેવી રીતે પરિવર્તન લાવીને પર્યાવરણની જાળવણી કરી શકીએ તેની વાત છે. મિશન લાઇફ કાર્યક્રમનો આરંભ થયો એ જ સમયગાળામાં સ્વીડનમાં પર્યાવરણ ક્ષેત્રમાંથી એક સુખદ સમાચાર દુનિયાને મળ્યા. સ્વીડનમાં જળવાયુ મંત્રી તરીકે ૨૬ વર્ષીય મહિલા મંત્રીની નિમણૂક કરવામાં આવી.

આ મહિલાનું નામ છે રોમિના પૌરમોખ્તરી. પર્યાવરણ સંરક્ષણને લઈને છેલ્લાં કેટલાંક વર્ષોથી સ્વીડન કેન્દ્ર સ્થાને રહ્યું છે, કારણ કે પર્યાવરણ જાળવણી અંગે જાગૃતિ લાવવાની શરૂઆત સ્વીડનથી થઈ હતી. એ જ સ્વીડનમાં જળવાયુ મંત્રાલયનો પદભાર રોમિનાને સોંપવામાં આવ્યો છે. આનંદની વાત એ છે કે રોમિનાએ માત્ર ૨૬ વર્ષની ઉંમરમાં મહત્ત્વના પદભારની જવાબદારી નિભાવવાનો આત્મવિશ્વાસ દાખવ્યો છે.

આશ્ચર્યની અને મજા પડે એવી વાત એ છે કે રોમિના ભૂતકાળમાં સ્વીડનના વર્તમાન વડાપ્રધાન ક્રિસ્ટર્સનની આલોચક રહી છે. આજે એ જ સરકારમાં તે જળવાયુ મંત્રી તરીકે કામ કરશે. રોમિનાનો જન્મ ઇરાની પરિવારમાં થયો છે. સ્વીડનના અત્યાર સુધીના સૌથી યુવાન મંત્રી બનવાનું બહુમાન રોમિનાને પ્રાપ્ત થયું છે.