મહિલાઓનું મતદાન અભિયાન, સમજો તમારા ‘મત’નું મૂલ્ય

ગુજરાતમાં ઇલેક્શનની તારીખો જાહેર થતાં જ જદા-જુદા પક્ષોએ જીત માટે કમરકસી લીધી છે. ત્યારે પોતાનો મત કેટલો અમૂલ્ય છે, તેના માટે આ વર્ષે મહિલાઓએ મતદાન જાગૃતિ અભિયાન હાથ ધર્યું છે. મહિલા ગ્રૂપ દ્વારા અન્ય મહિલાઓને એ સમજાવવાનો પ્રયાસ કરી રહ્યાં છે કે, કોઈ પણ સંજોગોમાં મતદાન કરવું જ જોઈએ, એક મત પણ કિંમતી છે. જેની માટે કિટી પાર્ટી, ગેટ ટુ ગેધર, ગ્રૂપ ટૉકિંગ, વીડિયો કૉલ અને સોશિયલ મીડિયાનો ઉપયોગ કરવામાં આવે છે. અનેક મહિલાઓનાં ગ્રૂપ મતદાન જાગૃતિ અભિયાનમાં અગ્રેસર રહીને મતદાનનું મહત્ત્વ સમજાવી રહ્યાં છે.

- હેતલ રાવ

સવાર સવારમાં નિકિતા વહેલા વહેલા કામ પતાવવાની દોડધામમાં લાગેલી હતી. ત્યાં જ સાસુમાએ પાછળથી ટોકતાં કહ્યું કે, ‘કેમ આજે ઉતાવળે કામે લાગી છે, બહાર જવાનું છે?’ ત્યારે નિકિતાએ કહ્યું, ‘અરે ના..ના.મમ્મી આ તો ચૂંટણીની તારીખો જાહેર થઈ ગઈ છે. માટે અમારા કિટી ગ્રૂપે નક્કી કર્યું છે કે હવે રોજ બે કલાક શહેરના જુદા-જુદા વિસ્તારો અને એવી મહિલાઓ જેમને પોતાના મતનું મૂલ્ય જ ખબર નથી તેમને ત્યાં જવાનું અને તેમને મતદાન વિશેની સમજ આપવાની.’ ત્યારે સાસુ કોકિલાબહેન બોલ્યાં કે, ‘પણ એમ તમને લોકોને કેવી રીતે ખ્યાલ આવે કે ક્યાં જવું, કઈ મહિલાઓ પાસે જવું?’ ‘મમ્મી અમે તેની માટે પણ ડેટા ભેગો કર્યો છે. ખાસ કરીને સ્લમ વિસ્તારમાં મહિલાઓ મતદાનને લઈને જાગૃત નથી. આ ઉપરાંત પણ ઘણા વિસ્તારો છે. અરે, ઘણી જગ્યાએ તો એજ્યુકેટેડ મહિલાઓ પણ મતદાન કરવા જવાનું ટાળે છે. કહે છે કે મારા એક મતથી શું ફરક પડે. બસ, આવી અનેક મહિલાઓ માટે અમારા કિટી ગ્રૂપે નક્કી કર્યું છે કે અમે મતદાન જાગૃતિ અભિયાન ચલાવીશું. એકાદ મહિનો કિટી પાર્ટીમાં ગેમ નહીં રમીએ, બહાર ફરવા નહીં જઈએ અને અન્ય પ્રવૃત્તિ નહીં કરીએ તો કોઈ ફરક નહીં પડે, પરંતુ જો અમારા આ અભિયાનથી મહિલાઓમાં થોડી પણ જાગૃતિ આવી તો અમને સારું કામ કર્યાનો સંતોષ થશે.

ઉપરની વાત સાંભળીને પહેલાં તો જરા નવાઈ લાગે કે, વળી હવે તો લોકો મતદાનને લઈને ઘણા જાગૃત છે, તોપણ આવા અભિયાનની જરૂર છે, પરંતુ હકીકતમાં ઘણી વખત આપણને જે લાગતું હોય તે સાચું નથી હોતું. આજે પણ મહિલાઓમાં મતદાનને લઈને નિરસતા જોવા મળે છે. ઘરનો પુરુષ વર્ગ મતદાન કરી આવે એટલે તેમને પત્યું. પોતે મતદાન કરવું છે કે મારે પણ મતદાન કરવું જ જોઈએ જેવી વાતો તેમની માટે ખાસ મહત્ત્વની નથી, કારણ કે તેમને તો ફક્ત પોતાનાં ઘર, સમાજ, વ્યવહારો અને પરિવારથી જ મતલબ હોય છે. પોતાનો મત કેટલો કિંમતી છે તેની તો જાણ સુદ્ધાં નથી હોતી. માટે આજે પણ અનેક જગ્યાએ મહિલાઓ દ્વારા મતદાન કરવામાં ઉદાસીનતા જોવા મળે છે.