સૌરાષ્ટ્રમાં પાટીદાર નારાજીનું પરિબળ ગાયબઃ ફાયદો કોને?

ભાજપમાં જોડાયા પહેલાં બહુ બોલકા નેતા ગણાતા હાર્દિક પટેલ ભાજપમાં જોડાયા પછી એકદમ મૌન બનીને અને મીડિયાથી દૂર રહીને પોતાના ફિલ્ડવર્કના કામે લાગી ગયા હતા

ગુજરાત વિધાનસભાની ચૂંટણીના પહેલા તબક્કાના મતદાનમાં સૌરાષ્ટ્ર અને દક્ષિણ ગુજરાતની ૮૯ બેઠકોનો સમાવેશ થાય છે. તેમાં સૌરાષ્ટ્રની બેઠકો ભાજપ માટે પડકારરૂપ બની રહી છે. ૨૦૧૭ની ચૂંટણીમાં પણ ભાજપને સૌરાષ્ટ્રમાં નુકસાન થયું હતું, પરંતુ ત્યારે પાટીદાર આંદોલનની અસરને કારણે આવું બન્યું હોવાનું માનવામાં આવતું હતું.

આ વખતે એ ફેક્ટરની કોઈ અસર નથી. બલ્કે, પાટીદાર સમાજ ભાજપની પડખે અડીખમ ઊભો હોવાનું જોવા મળેલ છે. તેમ છતાં, આ વખતે પણ સૌરાષ્ટ્રમાં ભાજપ માટે પરિસ્થિતિ જોઈએ તેટલી સરળ નથી અને આ વાત ભાજપના સ્થાનિક નેતાઓથી માંડીને ટોચના નેતાઓ સુધીના સૌ કોઈ જાણે છે અને એટલે જ ભાજપની ટોચની નેતાગીરી સૌરાષ્ટ્રની અનેક બેઠકો પર જાતે નજર રાખી રહી છે. એટલું જ નહીં તો, કેટલીક મહત્ત્વની બેઠકો જીતવા માટે ચૂપચાપ ઑપરેશનો પાર પાડી રહી છે.

જેમ કે, ખંભાળિયા વિધાનસભાની બેઠક પર કોંગ્રેસનું વર્ચસ્વ જોવા મળતું રહ્યું છે, પરંતુ આ વખતે ખંભાળિયા વિધાનસભાની બેઠક કોઈ પણ ભોગે કબજે કરવા માટે ભાજપ એડી ચોટીનું જો૨ લગાવી રહ્યો છે.

જામનગર લોકસભાની બેઠક ભાજપ પાસે છે અને ત્યાંના લોકસભાનાં સભ્ય પૂનમબહેન માડમ આહીર કોમ્યુનિટીનાં છે. ખંભાળિયા વિધાનસભાની બેઠક પર આહીર સમાજનો દબદબો રહે છે. આ બેઠક પર ગત ચૂંટણીમાં વિક્રમ માડમ ચૂંટાઈ આવ્યાં હતાં, જે પૂનમબહેન માડમના સંબંધી પણ છે, પરંતુ રાજકીય રીતે બંનેના માર્ગ અલગ-અલગ છે.

ભાજપે ખંભાળિયાની બેઠક પર તેના ગઈ ચૂંટણીના પરાજિત ઉમેદવાર મૂળુ બેરાને ઊભા રાખ્યા છે. તેઓ ઉમેદવારી પત્ર ભરવા ગયા હતા ત્યારે તેમની સાથે ખંભાળિયાના વતની અને અગ્રણી ઉદ્યોગપતિ પરિમલ નથવાણીની હાજરી સૂચક બની રહી હતી.