ગીતાંજલિ શ્રી, ગુજરાત અને રેત સમાધિ

ગીતાંજલિ શ્રી હિન્દી સાહિત્યનાં જાણીતાં સાહિત્યકાર છે. તેમની કૃતિ ‘રેત સમાધિ’ને આંતરરાષ્ટ્રીય ખ્યાતિ પ્રાપ્ત બુકર પ્રાઇઝ એનાયત કરવામાં આવ્યું છે. ભારતીય સાહિત્યકારો અને હિન્દી સાહિત્ય જગત માટે આ સન્માન પ્રાપ્ત થવું ગૌરવશાળી ઘટના છે.

વર્ષ ૨૦૨૨ વિદાય લેવાની તૈયારીમાં છે. આ વર્ષે પણ ઘણી જાણી-અજાણી, ગમતી-અણગમતી ઘટનાઓ-દુર્ઘટનાઓ ઘટી, પણ કોરોના કાળની સરખામણીમાં વર્તમાન વર્ષ એકંદરે સારું પસાર થયું. ઘણીબધી સારી- પ્રેરણાદાયક ઘટનાઓ પૈકીની એક ઘટનાની વાત કરીએ તો તે સાહિત્ય જગતમાંથી આવી અને આમેય છેલ્લા કેટલાક સમયથી હિન્દી ભાષાના મહત્ત્વ અને ઉપયોગને લઈને રાજકીય અને કેન્દ્રીય સ્તરે ઘણા વિવાદો ચર્ચાનું કેન્દ્ર બન્યા હતા. સાહિત્ય અને હિન્દીની વાત આજે આપણે એટલા માટે કરી રહ્યા છીએ, કારણ કે આજે આપણે જે વ્યક્તિ અને ઘટનાની વાત કરવાના છીએ તે હિન્દી સાહિત્ય જગત સાથે જોડાયેલી છે. એમ કહી શકાય કે આંતરરાષ્ટ્રીય સ્તરે હિન્દી ભાષા અને હિન્દીભાષી સાહિત્યકારે ઇતિહાસ રચ્યો. આ ઇતિહાસ રચનારાં સાહિત્યકારનું નામ છે ગીતાંજલિ શ્રી.