કાયમ વિરોધ,સતત નકારાત્મકતા, સદૈવ આસુરીવેડા?

આપણે આપણા વ્યક્તિગત ફાયદા-નુકસાન 'ને ગમા-અણગમા બાજુમાં મૂકીને અભ્યાસ કરી શકીએ તો જ ખરો વિવેક જાગૃત થાય 'ને કોનામાં વિવેક ઓછો છે એ ક્લિયર થાય, બાકી નહીં ટેક્સ ઓછા કરી ’ને ડેવલપમેન્ટ કે પ્રોગ્રેસ કમ કરવાનું લોજિક જેણે પોતે પૈસા બચાવવા છે એમને સ્વાદિષ્ટ તેમ જ સાત્ત્વિક લાગે, પણ લાંબા ગાળે શું થાય? કોઈ સ્થિતિ એની એ ના રહે અમૃત એકલા દેવોથી ના જ નીકળે, પણ અસુરત્વ પર કડક કાબૂ ના રાખો તો ક્યાં તો અમૃત નીકળે જ ના ક્યાં તો નીકળે તો અસુરો ફરી વળે

- ગૌરાંગ અમીન

જગતમાં કોઈ કોઈનું ’ને કોઈનું કશું નથી, કુલ બધાં ’ને પૂર્ણ બધું સૌનું સાથે છે

જીવનમાં તમસના અંધકારનું રાક્ષસી મિશન બીજું નહીં, બીજાનું નહીં કરવાનું છે

ચૂંટણીની આસપાસ તેમ જ ચૂંટણીની તારીખ જાહેર થઈ એ પહેલાંનાં પાંચ વર્ષ દરમિયાન અમુક નેતાઓ ’ને પ્રજાના અમુક ભાગની માનસિકતામાં જે ખાસ અભ્યાસ કરવા જેવો મુદ્દો છે તે છે કટ્ટર વિરોધવૃત્તિ કે નિષેધવાદ. અમેરિકાની જેમ આપણી લોકશાહીમાં ચૂંટણી કેવળ બે જ પક્ષ વચ્ચેની બાબત નથી. આ વખતે ગુજરાતમાં ત્રીજો પક્ષ આવ્યો છે એવું ઘણા માને છે. જાણનારા જાણે છે કે અગાઉ પણ બે કરતાં વધુ પક્ષ ગુજરાતમાં ચૂંટણી લડી ચૂક્યા છે. હજુ ભવિષ્યમાં કેટલીય ચૂંટણી આવશે, પણ જીવનમાં તો વર્ષોથી રોજ ચૂંટણી ચાલે છે. સાચા ’ને ખોટા વચ્ચે. સારા ’ને ખરાબ વચ્ચે. કામનું ’ને નકામું વચ્ચે. ધર્મ એવમ આધ્યાત્મમાં બે વિપરીત ધ્રુવ વચ્ચેની અવઢવ સાથે જોડાયેલો શબ્દ છે દ્વૈત. પોઝિટિવ ’ને નેગેટિવ સામાન્ય રીતે જીવનમાં મોટા ભાગના મન માટે સ્પષ્ટ હોય છે, પણ જીવનમાં ઘણી વાર અસમંજસની સ્થિતિ થાય છે કે કઈ દિશા હકારાત્મક ’ને કઈ દિશા નકારાત્મક. જોકે ઘણા મનુષ્યોને સહેજ પણ કનફ્યુઝન નથી થતું કે કઈ બાજુ જોવું ’ને કઈ બાજુ ના જવું. એ જીવો એક કે બીજી રીતે કટ્ટર નકારાત્મકતા ધારણ કરી બેઠાં હોય છે, કે પછી કટ્ટર નિષેધાત્મકતાએ એમના પર ડેરો નાખ્યો હોય છે.