૨૦૨૪ માટે વિપક્ષો નીતિશ કુમારનું નેતૃત્વ સ્વીકારશે?

૨૦૨૪ની લોકસભાની ચૂંટણીમાં વડાપ્રધાનપદના વિરોધપક્ષના સર્વસંમત દાવેદાર બનશે કે કેમ? એ સવાલ છે

બિહારમાં જનતાદળ યુનાઇટેડની રાષ્ટ્રીય કારોબારી સમિતીની યોજાઈ ગયેલી બેઠકમાં નીતિશ કુમાર પોતાના અને પક્ષના ભાવિ એજન્ડા વિશે જાહેરાત કરતાં એ વાત સ્પષ્ટ કરી છે કે, તેઓ રાષ્ટ્રીય રાજકારણમાં ૨૦૨૪ની લોકસભાની ચૂંટણીને લક્ષમાં રાખીને વિરોધપક્ષની એકતા માટે હવે કામ કરવાના છે અને ૨૦૨૭માં બિહારમાં યોજાનાર વિધાનસભાની ચૂંટણીનું નેતૃત્વ રાષ્ટ્રીય જનતા દળના લાલુપુત્ર તેજસ્વી યાદવ કરશે. તેનો અર્થ એ થયો કે, બિહારમાં ભવિષ્યમાં જનતા દળ (યુ) રાષ્ટ્રીય જનતા દળ સાથે મોરચો અને ગઠબંધન ચાલુ રાખશે, પરંતુ તેમની પાર્ટી તેજસ્વી યાદવનું નેતૃત્વ સ્વીકારશે.

બિહારમાં પીછેહઠ કરી રહેલા જનતા દળ (યુ)ને નીતિશ કુમારની ગેરહાજરીથી વધારે નુકસાન થવાની શક્યતા છે. નીતિશ કુમાર હવે રાષ્ટ્રીય રાજકારણમાં ભૂમિકા માટે તત્પર બન્યા છે. જોકે તેઓ ૨૦૨૪ની લોકસભાની ચૂંટણીમાં વડાપ્રધાનપદના વિરોધપક્ષના સર્વસંમત દાવેદાર બનશે કે કેમ? એ સવાલ છે. તેઓ પોતે પણ પરિસ્થિતિને સમજીને અત્યારે વડાપ્રધાન પદ માટે દાવેદારીની વાત કરતા નથી, પરંતુ તેમના મનમાં એ જ વાત પડેલી છે. હકીકત એ છે કે, કોંગ્રેસ સહિતના અન્ય વિરોધપક્ષો નીતિશકુમારની દાવેદારીનો સ્વીકાર કરશે કે કેમ તે અત્યારથી કહી શકાય તેમ નથી.