જમીનોના ગેરકાયદે કબજા સામે સરકાર વર્ષો પછી કેમ જાગે છે?

સૌથી મોટો સવાલ એ છે કે, જે જમીન પર દાયકાઓથી ગેરકાયદે કબજો કરાયેલો હોય, તેને ખાલી કરાવવા માટે રેલવે અત્યાર સુધી કેમ જાગી નહીં

- ચાણક્ય

ઉત્તરાખંડમાં હલદવાનીમાં રેલવેની જમીન ઉપર વર્ષોથી કબજો કરીને ત્યાં મકાનો બાંધી રહેતાં હજારો પરિવારોને રાતોરાત મકાનો ખાલી કરવા સામે મનાઈહુકમ આપીને સર્વોચ્ચ અદાલતે માનવીય દૃષ્ટિકોણ અપનાવી મોટી રાહત આપી છે.

ઉત્તરાખંડ હાઈકોર્ટે રેલવેની તરફેણમાં ચુકાદો આપીને હાલની ઉગ્ર ઠંડીમાં લગભગ ૫૦ હજાર લોકોનાં બેઘર બનવાનો ખતરો સર્જાયો હતો. સર્વોચ્ચ અદાલતે તાત્કાલિક આ મકાનો ઉપર બુલડોઝર ફેરવવા સામે રોક લગાવી છે. જોકે, સર્વોચ્ચ અદાલતે આ કહેવાતા અતિક્રમણકારી પરિવારોને હંગામી ધોરણે જ રાહત આપી છે. કેમ કે, નિયમ વિરુદ્ધ જમીન ઉપર કબજો જમાવવાની બાબતને કોઈ અદાલત યોગ્ય ઠેરવી શકે નહીં. એથી જો આ કબજો ગેરકાયદે હોય તો તેને આજે નહીં તો કાલે અથવા ભવિષ્યમાં ખાલી કરવો પડશે.