ટીવી ચેનલો માટેની ગાઇડલાઇન્સનું પાલન જરૂરી છે..

મુદ્દો એ પણ છે કે આખરે સોશિયલ મીડિયાનાં વિવિધ માધ્યમો પર વાયરલ થતાં આવાં ચિત્રો અને વીડિયોને સંબંધિત સોશિયલ મીડિયા એકમો પોતાના સ્તરેથી જ તેને અટકાવતા કેમ નથી?

કેન્દ્ર સરકારના માહિતી અને પ્રસારણ મંત્રાલય દ્વારા તાજેતરના ટેલિવિઝનની સમાચાર ચેનલો માટે એક માર્ગદર્શિકા જાહેર કરીને સોશિયલ મીડિયા પર વાયરલ થતાં વીડિયોની ક્લિપિંગ્સને દર્શાવવા બાબતમાં સાવચેતી રાખવા જણાવ્યું છે. આ બાબત ખૂબ જ મહત્ત્વની છે.

સોશિયલ મીડિયા પર બાળકો, મહિલાઓ તેમ જ વૃદ્ધ લોકો સામેની હિંસા તેમ જ દુર્ઘટના અને અન્ય પ્રકારની વિકૃત ઘટનાઓ અંગેના વીડિયો વાયરલ થાય છે, એવા વીડિયો જોનારાઓના માનસ પર તેની વિપરીત અને ગંભીર અસર થાય છે. સૌને તેનો અનુભવ પણ છે અને એથી આવા વાયરલ થયેલા વીડિયો સર્વને માટે સુલભ બને તે યોગ્ય નથી હોતું, તેનાથી ઘર-પરિવાર અને સમાજનો માહોલ બગડે છે, એથી આવા વીડિયોની ક્લિપિંગ્સ એડિટ કરીને તેને ટીવી-ચેનલો પર દર્શાવવી જોઈએ, પરંતુ હકીકતમાં બને છે એવું કે, આવા વાયરલ વીડિયો એડિટ થયા વિના જ સીધા ટીવી ચેનલો પર પ્રસારિત કરી દેવામાં આવે છે.