સ્વાદના શોખીનોને સંતોષનો ઓડકાર ખવડાવવાનો શોખ

આપણી આસપાસ બહુ ઓછી એવી વ્યક્તિઓ હશે જેમનો શોખ જ તેમનો વ્યવસાય હોય. અનેક લોકો પોતાના મુખ્ય વ્યવસાયની સાથે પોતાનો શોખ પૂરો કરવા માટે પણ અલગ-અલગ પ્રવૃત્તિઓ કરતા હોય છે. ‘અભિયાન’ એવા લોકોને મળ્યું કે જેમનો મુખ્ય વ્યવસાય કોઈ બીજો હતો, પણ જિંદગીના એક પડાવે તેમણે ફૂડને પોતાનો વ્યવસાય બનાવી દીધો અને કંઈક નવીન કરવાનો પ્રયત્ન કર્યો. જોકે તેમણે માત્ર કમાણીને મુખ્ય હેતુ ક્યારેય બનવા દીધો નહીં, બલ્કે ગ્રાહકનો સંતોષ જ હંમેશાં તેમની પ્રાથમિકતા બની રહી.

- આર્જવ પારેખ

જયૉર્જ બર્નાર્ડ શોએ કહ્યું છે, ‘આ દુનિયામાં આહારથી વધુ નિષ્ઠાવાન પ્રેમ બીજો એકેય નથી.’ આપણી આસપાસ અનેક લોકો એવા જોવા મળે છે કે જેઓ આંખ મીંચીને આ વિધાનને અનુસરતા હોય છે. તેમના માટે સતત નવીન ખાવું એ જ સર્વસ્વ હોય છે. તો સાથે એવા લોકો પણ જોવા મળે છે કે જેમણે કંઈક નવું અને ઉમદા ભોજન બનાવીને પીરસવું એને જ પોતાનો જીવનમંત્ર બનાવી લીધો છે. પછી ભલે ને તેઓ મહિને લાખ રૂપિયાના પગારની નોકરી કરતાં હોય, પરંતુ લોકોને સારું, સ્વાસ્થ્યપ્રદ અને સ્વાદિષ્ટ ખાવાનું પીરસવા માટે તેઓ ચાર રસ્તા પર લારી ઊભી રાખતાં પણ અચકાતાં નથી. આમ જોવા જઈએ તો અમદાવાદમાં વિશ્વના સૌથી મોંઘી ખાદ્યચીજો વેચતા સ્ટારબક્સ જેવાં આઉટલેટ પણ આવેલાં છે અને લારી કે નાના સ્ટોલ પર વેચાતું સ્ટ્રીટફૂડ પણ ખૂબ મોટા પ્રમાણમાં જોવા મળે છે. આ બંને અલગ છેડાની વચ્ચે એક નવો પ્રવાહ આજકાલ અમદાવાદમાં જોવા મળી રહ્યો છે, જેમાં અમુક વ્યક્તિઓ શોખથી લોકોને શ્રેષ્ઠ ખાવાનું પીરસવા માટે નાના-નાના ફૂડ સ્ટોલ ચલાવી રહી છે. તેઓ માત્ર કમાવા માટે જ નહીં, પરંતુ શોખ માટે આ કામ કરતાં હોવાથી વિવિધ વાનગીના ભાવ પણ વાજબી રહે છે. વળી, ખોરાકની ગુણવત્તા જાળવવાનો તેમનો પ્રયાસ પણ ધ્યાન ખેંચે છે. તેના કારણે આ પ્રકારના આઉટલેટ્સ વધુ ને વધુ પ્રખ્યાત થઈ રહ્યાં છે.

અન્નપૂર્ણા ફૂડ કોર્નર - નારણપુરા

‘પહેલાં ચાખો, પછી ઑર્ડર આપો’ના સૂત્ર સાથે નારણપુરા વિસ્તારમાં નાનકડો ફૂડ સ્ટોલ ચલાવતાં મિતાલીબહેન જોશીએ ટૂંકા ગાળામાં પોતાના ફૂડ કોર્નરના ‘અન્નપૂર્ણા’ નામને સાર્થક કર્યું છે. તેઓ વ્યવસાયે હેલ્થ કન્સલ્ટન્ટ છે અને યુ-ટ્યૂબર પણ છે. એમના પતિ નિમેશભાઈ વ્યવસાયે કેમિકલ એન્જિનિયર છે. તેઓ બંને સાથે મળીને સવાર-સાંજ પોતાના મુખ્ય વ્યવસાયની સાથે સાથે છેલ્લા પાંચ મહિનાથી આ સ્ટોલ ચલાવે છે. દિવસે ને દિવસે તેમની ઘરાકી વધતી જાય છે.