સમયની સાથે બદલાયું મોર્નિંગ બ્રેકફાસ્ટનું સ્વરૂપ

એક સમય હતો ઘરમાં મહેમાનોનું આગમન થાય એટલે સવારના નાસ્તાથી લઈને સાંજના વાળુ સુધીની યાદી તૈયાર થઈ જતી. એમાં પણ ગુજરાતીઓના ઘરે તો નાસ્તો એટલે જાણે ભરપેટ નિરાંતનો ઓડકાર, જેના માટે ઘરની મહિલાઓ કેટકેટલી તૈયારીઓ કરતી, પરંતુ હવે બદલાતા સમય સાથે મૉર્નિંગ બ્રેકફાસ્ટનું સ્વરૂપ બદલાયું છે. સવારે નાસ્તા બનાવવાની ઝંઝટમાંથી મહિલાઓને મુક્તિ મળી છે. એક ઑર્ડર અને મનગમતો નાસ્તો ઘરે હાજર.

- હેતલ રાવ

અનિતાબહેને રાડ પાડતાં કહ્યું, ‘તમને તો કાંઈ ચિંતા જ નથી, સ્વરૂપાના સાસરીવાળા કાલે સવારનો નાસ્તો આપણે ત્યાં કરવાના છે. યાદ છે ને.. અને આ સાંજ થવા આવી, પણ તમે કોઈ નાસ્તાનું મેનુ જ નક્કી નથી કરતા. તે લોકો તો વર્ષોથી મુંબઈ રહે છે, પાછી આપણી અને તેમની રહેણી-કરણી પણ કેટલી અલગ છે. તેમણે તો ખબર નહીં, સવારના નાસ્તાને લઈને કેવી-કેવી ધારણાઓ બાંધી લીધી હશે અને હવે તેમાં જો આપણે ખરા ના ઊતરીએ તો વેવાઈ આગળ નાક કપાય, પણ તમને બધાને તો કંઈ પડી જ નથી. બધી ચિંતા મારે એકલીને જ કરવાની.’

સ્વરૂપાએ મમ્મીને કહ્યું, ‘ફૂલ મૉમ, તમે નાહકની જ ફિકર કરો છો. બધુંય થઈ જશે.’ ‘હવે તું તો ચૂપ જ રહેજે.’ અનિતાબહેને દીકરી સ્વરૂપાને ધમકાવતાં કહ્યું, ‘એક તો જાતે છોકરો પસંદ કરી લીધો અને પાછું..’ એટલામાં સ્વરૂપાનો ભાઈ બોલ્યો, ‘અરે મૉમ, તમે ખરેખર કારણ વગરની ચિંતા કરો છો. અત્યારે તો મોબાઇલ પર એક ક્લીક કરીએ અને મનગમતો નાસ્તો હાજર.’‘પણ આમ વેવાઈને થોડો હોટલોનો નાસ્તો કરાવાય? જમવાનું બહારથી મગાવીએ એ ઠીક છે, પણ નાસ્તો તો ઘરનો જ હોય ને? અને આમ વહેલી સવારે કોણ નાસ્તા લઈને તમારી માટે બેઠું હશે!’ અનિતાબહેનની આટલી બધી કચકચ સાંભળી, અંતે સ્વરૂપાએ કહ્યું, ‘મૉમ, આપણી બાજુની જ સોસાયટીમાં રમા આન્ટી છે, જે ઘરે તમામ પ્રકારના નાસ્તા બનાવે છે. બસ, આપણે ઑર્ડર કરીએ એટલે તૈયાર.’ ‘પણ વહેલી સવારે આમ થોડા નાસ્તા બનાવી આપે?’

‘અરે મૉમ, અડધી રાત્રે પણ ગરમાગરમ નાસ્તો બનાવે છે આન્ટી. મારી મિત્ર બંસરી તે જ સોસાયટીમાં રહે છે, તેણે જ મને કહ્યું હતું અને તારે જે પણ નાસ્તો બનાવવો હશે તે બધો જ બનાવી આપશે અને ઘરે આવીને આપી પણ જશે, ગરમાગરમ તારા સમયે.’