‘ટાલ’નો પણ એક તાલ હોય છે!

'ટાલ પડવાથી માણસ જુવાન તરીકે મટી નથી જતો. યુવાનોને પણ ટાલ ક્યાં નથી હોતી? હોય જ છે ને.. પેલા રોહિત શેટ્ટીને ટાલ છે એટલે એ બુઢ્ઢો થઈ ગયો?’

- હર્ષદ પંડ્યા ‘શબ્દપ્રીત'

નાનપણમાં ટાલ વિશે સાંભળેલું ખરું, પણ અનુભવેલું નહીં. સાંભળ્યાના સુખ કરતાં અનુભવ્યાનું દુઃખ વધારે હોય એવું લગ્નના સંદર્ભે જ કહેવાય એવું કોણે કહ્યું? ઘણા બધા પ્રસંગો અને ઘણી બધી પરિસ્થિતિઓ આપણા જીવનને યાદગાર બનાવવામાં પોતાનો યથાશક્તિ ફાળો આપે છે.

અહાહાહા..! કેવા કાળા ભમ્મર અને જથ્થાદાર વાળ હતા! જેનું વર્ણન કરતાં કવિઓ તો ઠીક, કેશકર્તન કલાકારો પણ થાકતા નહોતા, વાઇફ તો પોતાના ફ્રેન્ડ્સ સર્કલમાં ગર્વથી ઊંચી ડોક રાખીને કહેતી, ‘મેં તો એમને પહેલી નજરે જ પસંદ કરી લીધેલા! વાહ, શું વાળ હતા એમના!’ આ સાંભળીને કોઈ ફ્રેન્ડ વાઇફને પૂછતીઃ ‘એમ? એટલા સુંદર વાળ હતા? મને તો લાગે છે કે તમારા હસબન્ડના વાળ જોઈને એમની સામાજિક, આર્થિક સ્થિતિ વિશે પૂછવાનું જ ભૂલી ગયા હશો, ખરું ને?’ ત્યારે પણ વાઇફ તો ગૌરવભેર કહેતી: ‘વાળ સિવાય, બીજું કાંઈ પૂછવા જેવું, એમની પાસે હોય એવું લાગવું જોઈએ ને?’

વાઇફની વાત સાચી છે, એ દિવસમાં મારી પાસે વાળ સિવાય ગુમાવવા જેવું બીજું કશું હતું પણ નહીં. વાળની હું બહુ જ કાળજી રાખતો. વાળ કપાવવા ગયો હોઉં ત્યારે કેશકર્તનકારને પ્રસન્ન રાખવા હું સ્પેશિયલ ચા પણ પીવડાવતો. ક્યારેક એ પૂછતોઃ ‘સાહેબ, સહેજ ઓછા કરું?’ ત્યારે હું એનો મનીબોક્સ (જે મારી ખુરશીની બાજુમાં હતો, એને) સહેજ ખોલીને કહેતોઃ ‘આમાંથી હું સહેજ ઓછા કરું?’ ત્યારે એ સમજી જતા કે, વાળ મારા માટે શું મૂલ્ય ધરાવે છે! અને આમેય, દેખાવની બાબતમાં આ વાળ સિવાય ગૌરવ લેવા જેવું મારી પાસે હતુંય શું? મારા શ્રીમંત મિત્રો, બસ આ જ બાબતે મારી ઈર્ષા કરતા. મારા ઉપર ભલે લક્ષ્મીજીની કૃપા નહોતી, પણ લક્ષ્મીપતિની પૂર્ણ કૃપા હતી એવું, એ દિવસોની મારી વાળસમૃદ્ધિ જોઈને મને લાગતું.

વાળની શ્રીમંતાઈ યાદ કરીને તમારામાં મારા પ્રત્યે ઈર્ષાની લાગણી પેદા થાય એવો મારો લેશ માત્ર આશય નથી. વળી મારા એ (અ)ભૂતપૂર્વ વાળને યાદ કરી મારા હૃદયને શોકનો અનુભવ પણ મારે શા માટે કરાવવો અને એટલે જ વાળવિહોણા અહીં અટકાવી, આવી પડેલી ટાલ વિશે કંઈક કહેવું છે.