ફ્તન દેવાળિયા પાકિસ્તાનને કુકર્મોનાં ફળ મળી રહ્યાં છે

પાકિસ્તાનને અમુક કરજ અને વ્યાજ ચૂકવવા માટે જ હાલમાં ત્રીસ અબજ ડૉલરની તત્કાળ જરૂર છે અને તેના પર કુલ દેવું એકસો અબજ ડૉલરથી વધારે છે. જે કટોકટીની સ્થિતિ શાહબાઝના સમયમાં ફેબ્રુઆરીમાં થઈ તે કદાચ ઈમરાન ખાન વડાપ્રધાન હોત તો માર્ચ કે એપ્રિલમાં થઈ હોત

- વિનોદ પંડ્યા

ઈમરાન ખાન વડાપ્રધાન હતા ત્યાં સુધી પાકિસ્તાની પ્રજાને ડરાવતા અને સાથે કહેતા કે, ‘આપ કો ડરના નહીં હૈ.’ એવું બોલતાં એટલે લોકો વધુ ડરી જતાં. ત્યારે પ્રજાનો ડર વાજબી હતો અને હવે ઈમરાન ખાને રાગ બદલ્યો છે. હવે એ પોતે જ કહી રહ્યા છે કે, ખૂબ ડરામણી સ્થિતિ આવી રહી છે. હવે નવી શાહબાઝ શરીફની સરકાર સત્તા પર છે. ઈમરાન ખાન કહે છે કે પોતાની સરકાર હતી ત્યારે સાડા સોળ અબજ ડૉલરનું વિદેશી હૂંડિયામણનું ભંડોળ હતું. હવે માત્ર સાડા ત્રણ અબજ ડૉલર રહ્યા છે. થોડા દિવસો માટેની આયાત થઈ શકશે. ઈમરાન ખાનના સમયમાં સ્થિતિ કંઈ સારી ન હતી. એ પણ રૂબરૂ જઈને અમેરિકા, સાઉદી અરેબિયા, ચીન અને યુનો (આઈએમએફ) સમક્ષ રૂબરૂ જઈને ઝોળી ફેલાવી ચૂક્યા હતા. આજે ઈમરાન ખાન વડાપ્રધાન હોત અને ડૉલરના વેડફાટ પર થોડી લગામ રાખી હોત તો સ્થિતિ થોડી બહેતર હોત. છતાં ખાસ મોટો ફરક પડ્યો ન હોત.