આજા મેરી ગાડીમેં બૈઠ જા..

‘અરરર..તમે ગાયનનો સાવ કચરો કરી નાખ્યો! બેન્ડબાજા કોઈ દિવસ છમ છમ વાગે?

- કલ્પના દેસાઈ

લાલ ટીશર્ટ ’ને નવું જીન્સ સોહાવીને, પર્ફ્યુમ-બર્ફ્યુમ છાંટીને મગનલાલને સવારથી જ બહુ મૂડમાં જોઈને મણિબહેનથી રહેવાયું નહીં.

‘શું વાત છે.. આજે કંઈ બહુ રંગમાં ને? હવે કોઈ સગલી તમારી સામે જોવા નવરી નથી તે યાદ રાખજો. આ ઘડે ઘડપણ શું ગંધાવાના ચાળા માંડ્યા છે?’

મગનલાલ તો અલગ જ મૂડમાં હતા એટલે વાત ઉડાવતા ગાવા માંડ્યા, ‘આજા મેરી ગાડીમે બૈઠ જા..આજા મેરી ગાડીમે બૈઠ જા.'

‘ઓ ભાઈ, કોને કહો છો? હવે કોને ગાડીમાં બેસાડવાના? જરા અરીસામાં મોઢું જોજો પહેલાં. ઘરની બહાર ગાશો 'ને તો સાદા વેશમાં ફરતી પોલીસ તમને ડંડા મારશે તે મારે છુપાઈને જોવા પડશે.’

‘અરે માજી, તમને જ કહું છું. ચાલો તૈયાર થઈ જાઓ. આજે આપણે ફરવા જવાના. લોઓઓ..ન્ગ ડ્રાઇવ પર જવાના.’

‘સવાર સવારમાં લો. .ઓ..ઓ..ન્ગ ડ્રાઇવ? ’ને માજી કોને કીધું? તમારા કરતાં તો બહુ નાની જ દેખાઉં છું આજે પણ, સમજ્યા ને?’

‘હા હા, એટલે જ કહું છું. ચાલ તો પછી, ‘હલ્લા મચાએંગે..ગુલ્લા મચાએંગે..બેન્ડબાજા બાજેગા છમ છમ છમ..’

‘અરરર..તમે ગાયનનો સાવ કચરો કરી નાખ્યો! બેન્ડબાજા કોઈ દિવસ છમ છમ વાગે? સા..વ.’

‘આજે તું મારી વાતમાં કંઈ બોલતી નહીં. હું જેમ કહું તેમ કર્યા કર. (રોજની જેમ) મારું ગાયન છે, જેમ ગાઉં તેમ મને ગાવા દે. તું બધી પંચાત કરતાં પહેલાં તૈયાર થવા માંડ જા, આ ઉંમરે પણ કલાક લગાડશે!' મણિબહેનને ટોકવાનો મોકો છોડે તો મગનલાલ શેના?

મગનલાલે પાછું લલકારવા માંડ્યું, ‘ચોપાટી જાએંગે ને ભેલપૂરી ખાએંગે, અચ્છી અચ્છી સૂરતોંસે આંખે લડાએંગે..’