બિનસર, કુમાઉની ઝંડી ધાર પહાડીઓમાં રહેલું નાનકડું ગામ

પ્રવાસ શોખીનો અને પ્રેમીઓ તો ચોમાસામાં પણ બિનસરનો પ્રવાસ કરે છે, કારણ કે ધુમ્મસ અને વાદળોથી ઘેરાયેલું મોન્સૂન બિનસર પ્રેમીઓ માટેનો રોમેન્ટિક ગેઇટ વે સાબિત થાય છે

- રક્ષા ભટ્ટ

ઉત્તરાખંડ પાસે કુમાઉ અને ગઢવાલ એવા બે પ્રદેશો છે જેમાં કુમાઉ પાસે હરીભરી પ્રકૃતિ વચ્ચે એકાંત ઇચ્છતાં હિમાલય પ્રેમીઓનો હાથ પકડી શકે એવાં કેટલાંક સ્વપ્નિલ સ્થળો છે, જ્યાં હિમાલયન શિખરોનો વ્યૂ છે; દેવદારનાં જંગલો વચ્ચેની ટ્રેઇલ છે; પંખી-પ્રાણીઓના રંગો છે; અભયારણ્યો છે; પ્રાચીન મંદિરો છે; લેઝરલી કોટેજીસ, કેમ્પ સાઇટ્સ, વિશાળ રિસોર્ટ્સ છે અને છે લન્ચ-બ્રેકફાસ્ટ અને ફળફળતું ડિનર પીરસતા પેકેજીસ પણ.

એકસાથે આટલું બધું અર્પણ કરતાં અનેક હિમાલયન પ્રદેશોમાંનું એક છે, બિનસર. આ બિનસર ઉત્તરાખંડના અલ્મોડા જિલ્લામાં આવેલું નેસડું છે, જે અલ્મોડાથી માત્ર ત્રીસ કિલોમીટર દૂર છે અને પ્રવાસન સાથે સંકળાયેલા લોકો તેને ટૉય ટાઉન પણ કહે છે. દરિયાઈ સપાટીથી આઠેક હજાર ફૂટની ઊંચાઈ પર સ્થિત બિનસર કવિ-લેખકો અને પ્રકૃતિપ્રેમીઓનું મનપસંદ થાનક છે. ખભે હૂંફાળી શાલ વીંટાળી હિમાલયન વૉક લેતાં કલાકાર જીવો અહીં હાથમાં સ્ટ્રોન્ગ કૉફીનો મોટો મગ લઈ દેવદારનાં વૃક્ષોમાં ગૂંથાયેલા રહે છે અથવા હિમાલયના ઉત્તુંગ શિખરોનો વ્યૂ લેવા કોઈ લાકડાંના બાંકડા પર નિરાંતે બેસે છે.

મંત્રમુગ્ધ કરતાં લૅન્ડસ્કેપ વચ્ચે ત્રણેક દિવસ લેઝરલી જીવી શકાય એવા બિનસરમાં વળી બિનસર કુમાઉ મંડલ વિકાસ નિગમના રિસોર્ટમાં નિવાસ બુક કરાવો તો ઊઘડતી સવારે રિસોર્ટની વિશાળ અગાસી પર પહોંચી જવાનું રહે. ચા-કૉફી અગાસી પર જ આવી જાય. હિમાલયન શિખરો પરથી ધીમે-ધીમે ધુમ્મસ ઊંચકાય અને સવારના કૂણા તડકે હિમાલયનાં પ્રખ્યાત શિખરોનાં ઘરેબેઠા દર્શન થાય. આપણે એ ક્ષણે આપણા કૅમેરા પર ઝૂમ લેન્સ ચડાવીને દૂરનાં શિખરોને નિકટ લાવી શકીએ કે ૮૦૦૦ હજાર ફૂટ ઊંચી અગાસીની એકાદ બેંચ પર બેસી સૂર્યોદય જોતાં-જોતાં એક-બે ખુશનુમા સવારને મનભરીને શ્વાસમાં પણ ભરી શકીએ.