લાફ્ટર વાઇરસ

એક ‘ઉમેદ’વાદી ઉમેદવારનું વચનબદ્ધ પ્રવચન!

- હર્ષદ પંડ્યા ‘શબ્દપ્રીત’

બહેનો અને ભાઈઓ,

સૌને નમસ્કાર, સૌને સૌના ધર્મ, પંથ અને સંપ્રદાયમાન્ય વંદન અને પ્રણામ!

તમને થશે કે આ નેતા લોકસભાની ચૂંટણી પૂરી થવાનો સમય આવ્યો ત્યારે જ કેમ પધાર્યા? મિત્રો, આવવું એ મહત્ત્વનું છે, ક્યારે આવવું એ નહીં અને એક વાત ખાસ યાદ રાખો કે અતિથિ અને વાવાઝોડું કોઈ નિશ્ચિત સમયે ન આવે!

આજે હું આપ સૌનાં દર્શન કરવા આવ્યો છું. આપ સૌનાં દર્શન કરી આજે હું મારી જાતને કૃતાર્થ અને સાર્થક કરી શક્યો છું એનો મને પરમ આનંદ છે.

શરૂઆતમાં મેં કરેલું સંબોધન ‘બહેનો અને ભાઈઓ' એ સાંભળીને તમને આશ્ચર્ય ચોક્કસ થયું હશે કે સામાન્ય રીતે મોટા ભાગના વક્તાઓ ‘ભાઈઓ અને બહેનો' અથવા તો ‘સજ્જનો અને સન્નારીઓ' એવું સંબોધન કરતા હોય છે. જોકે જનતાને પળે પળે આશ્ચર્યો આપવામાં અમારા લોકોની સારી ફાવટ છે. મેં આ સંદર્ભે આપ સૌને સંબોધન સહેજ જુદું એટલા માટે કર્યું છે કે હું ‘શક્તિ’ વંદનામાં માનું છું. લગ્ન પહેલાં હું શક્તિવંદનામાં નહોતો માનતો. એનો અર્થ એવો નહીં કે હું નાસ્તિક છું. ના, નાસ્તિક તો હું સહેજ પણ નથી . નાસ્તિક બનવું મને સહેજ પણ પોસાય નહીં, કેમ કે હું રાજકારણી છું – ચુસ્ત રાજકારણી. મારે જે પ્રાંતમાં જવાનું થાય, એ પ્રાંતનો પહેરવેશ મારે ધારણ કરવો પડે. એનું એક જ કારણ કે એ પ્રાંતની જનતાને એવું લાગે કે આ નેતા અમારો જ છે – અમારા માટે જ આટલી દોડાદોડી - જેને છાપાંની ભાષામાં ‘ઉડાઉડી’ કહેવાય એ કરે છે.