વિઝા વિમર્શ,

ગ્રીનકાર્ડ મેળવવાનો એક વધુ રસ્તો

- ડો.સુધીર શાહ

અમેરિકામાં જો કાયમ રહેવું હોય તો એ દેશમાં પ્રવેશવા માટે ઇમિગ્રન્ટ વિઝા મેળવવાની જરૂરિયાત રહે છે. ઇમિગ્રન્ટ વિઝા મેળવીને અમેરિકામાં પ્રવેશ્યા બાદ તમને ‘એલિયન રજિસ્ટ્રેશન રિસીપ્ટ' જે પ્લાસ્ટિકના એક વિઝિટિંગ કાર્ડની કદનું કાર્ડ આપવામાં આવે છે. સૌપ્રથમ જ્યારે આ કાર્ડ આપવાનું શરૂ કરવામાં આવ્યું ત્યારે એનો રંગ લીલો હતો. આથી સૌ આ એલિયન રજિસ્ટ્રેશન રિસીપ્ટને ગ્રીનકાર્ડ તરીકે ઓળખવા લાગ્યા.

ઇમિજેટ રિલેટિવ કૅટેગરી હેઠળ પુખ્ત વયનાં અમેરિકન સિટીઝન સંતાનો એમનાં માતા-પિતા માટે અને અમેરિકન સિટીઝનો એમની પત્ની યા પતિ માટે ગ્રીનકાર્ડ મેળવી શકે છે. ચાર જુદી-જુદી ફૅમિલી પ્રેફરન્સ કૅટેગરીઓ તેમ જ ઍમ્પ્લૉયમૅન્ટ બેઝડ પ્રેફરન્સ કૅટેગરી હેઠળ પણ એ પ્રાપ્ત કરી શકાય છે. વિઝા લોટરીમાં ભાગ લેવા સમર્થ હોવ અને ભાગ લઈને વિજેતા બનો તો પણ પ્રાપ્ત કરી શકો છો. રાજકીય આશરો માગીને યા રેફ્યુજી સ્ટેટસ મેળવીને કે પછી અમેરિકાના લશ્કરમાં ભરતી થઈને અને અમેરિકાની સરકાર એમ્નેસ્ટી જાહેર કરે તો એ દ્વારા પણ મેળવી શકો છો.

વર્ષ ૧૯૯૦માં આ બધી રીતોમાં એક વધુ રીતનો ઉમેરો કરવામાં આવ્યો. જે ચાર જુદી જુદી ઍમ્પ્લૉયર્મેન્ટ બેઝડ પ્રેફરન્સ કૅટેગરીઓ હતી, એમાં વર્ષ ૧૯૯૦માં અમેરિકાની સરકારે ધ ઇમિગ્રેશન ઍક્ટ ઑફ ૧૯૯૦’ ઘડીને એક પાંચમી કૅટેગરી ‘ઍમ્પ્લૉયમૅન્ટ બેઝડ ફિફથ પ્રેફરન્સ કૅટેગરી'નો ઉમેરો કર્યો, જેને આપણે સૌ ‘ઇબી-પ પ્રોગ્રામ’ કહીએ છીએ.