ફેમિલી ઝોન-ગાર્ડનિંગ.

બગીચાને તરોતાજા રાખવાતી જુદી-જુદી પદ્ધતિઓ

- હેતલ ભટ્ટ

પાણી, ખાતર, ફ્ળદ્રુપ માટી અને સૂર્યપ્રકાશ ફૂલછોડ માટે લાઇફ્લાઇન સમાન છે. યોગ્ય માત્રામાં યોગ્ય સમયે તે મળતા રહે તે જરૂરી છે. પૂરતા પ્રમાણમાં સપ્રમાણ પોષણ મળી રહે તો જ ગાર્ડનમાં રહેલા ફૂલછોડ તરોતાજા રહે છે. અન્યથા સૂકાઈ જતાં હોય છે. ઋતુઓ પ્રમાણે ફૂલછોડની પાણી-ખાતર અને સૂર્યપ્રકાશની જરૂરિયાત જુદી જુદી રહે છે. ઉનાળાના દિવસોમાં પાણી વધુ અને સૂર્યપ્રકાશની માત્રા ઓછી રહે છે. ચોમાસામાં બંને સપ્રમાણ મળી રહે તે જરૂરી હોય છે જ્યારે શિયાળામાં સૂર્યપ્રકાશ વધુ અને પાણીની જરૂરિયાત ઓછી રહે છે. તેમછતાં આ બધી જ વસ્તુઓ રોજેરોજ ફૂલછોડને મળતી રહે તે જરૂરી છે. હવે સૂર્યપ્રકાશ અને ખાતરનો તો વાંધો ન આવે પણ જ્યારે લાંબા સમય માટે ઘરની બહાર રહેવાનું થાય અથવા ટ્રાવેલિંગમાં જવાનું થાય ત્યારે ફૂલછોડને પાણી કેવી રીતે પાવું તે સમસ્યા ઉદ્ભવતી હોય છે. જો પર્યાપ્ત માત્રામાં પાણી ન મળે તો ફૂલછોડ સૂકાઈ જતાં હોય છે.