વિઝા વિમર્શ,

કચરાનો ડબ્બો

- ડૉ.સુધીર શાહ

અમેરિકાની પ્રેસિડન્ટ પદની ચૂંટણીના એક ઉમેદવાર, ભૂતપૂર્વ પ્રેસિડન્ટ ડોનાલ્ડ ટ્રમ્પે ૨૪ ઑક્ટોબર, ૨૦૨૪ના દિવસે એરિઝોના સ્ટેટમાં આવેલ ટેમ્પા શહેરમાં આયોજાયેલ ઇલેક્શનની રેલીમાં એવી મતલબનું જણાવ્યું કે, “અમેરિકા એક સુંદર દેશ હતો. ગેરકાયદેસર ઘૂસતા પરદેશીઓના કારણે એ એક ‘કચરાનો ડબ્બો’ (ગાર્બેજ કૅન) બની ગયો છે.’

અમેરિકાની પ્રમુખપદની બધી ચૂંટણી માટે ‘ઇમિગ્રેશન’ એક અગત્યનો વિષય હોય છે. શા માટે નહીં? અમેરિકા ઇમિગ્રન્ટોનો દેશ હતો, છે અને બની જ રહેશે. ભૂતપૂર્વ પ્રેસિડન્ટ ડોનાલ્ડ ટ્રમ્પે એમના પ્રમુખપદની ચૂંટણીનાં ભાષણોમાં આ પૂર્વે એવું પણ જણાવ્યું હતું કે, ગેરકાયદેસર અમેરિકામાં ઘૂસતા ઇલ્લિગલ ઇમિગ્રન્ટો એમના દેશની રક્તવાહિનીઓમાં ઝેરનો સંચાર કરે છે. એમણે અમેરિકામાં પ્રવેશવાની કોશિશ કરતાં અને પ્રવેશ કરી ચૂકેલા ઇલ્લિગલ ઇમિગ્રન્ટોને ‘જાનવરો' તરીકે પણ સંબોધ્યા છે. એમના મત પ્રમાણે અમેરિકામાં પ્રવેશી ચૂકેલા ગેરકાયદેસર પરદેશીઓને અમેરિકા બહાર ઝડપથી મોકલી દેવા જોઈએ. એમનું એવું કહેવું છે કે આ ઇલ્લિગલ ઇમિગ્રન્ટો અમેરિકાની પ્રજાના દુશ્મનો છે.

આજે અમેરિકા વિશ્વનો સૌથી આગળ પડતો દેશ ગણાય છે. ખનિજસંપત્તિથી એ ભરેલો છે. અમેરિકાના ટેક્સાસ સ્ટેટમાં જમીનની અંદર તેલના ભંડારો ભરેલા છે. કેલિફોર્નિયામાં સોનાની ખાણો છે. અમેરિકાની ગણના એક ઔદ્યોગિક દેશમાં થાય છે, તેમ છતાં ખેતીવાડીની ઊપજમાં અમેરિકા ખૂબ જ| આગળ છે. વિશ્વના અન્ય દેશોમાં જ્યારે જ્યારે દુષ્કાળની પરિસ્થિતિ ઊભી થઈ છે ત્યારે ત્યારે એ દેશોને અનાજ પૂરું પાડ્યું છે.