સન્માન

બેગુજરાતી સાહિત્યકારોને રાષ્ટ્રીય પુરસ્કાર

- કાશ્યપી મહા

ડિસેમ્બર મહિનામાં બે ગુજરાતી સાહિત્યકારોને રાષ્ટ્રીય પુરસ્કાર પ્રાપ્ત થયાના શુભ સમાચાર છે. હિમાંશી શેલતની ‘કુવેમ્પુ’ પુરસ્કાર માટે અને દિલીપ ઝવેરીની કેન્દ્રીય સાહિત્ય અકાદમી પુરસ્કાર માટે પસંદગી થઈ છે.

કન્નડ ભાષાના પ્રતિષ્ઠિત કવિ, નવલકથાકાર, નાટકકાર અને ચરિત્રલેખક કે. વી. પુટ્ટપ્પા જે ‘કુવેમ્પુ’ તરીકે જાણીતા છે, તેમના નામ સાથે કુવેમ્પુ પુરસ્કાર જોડાયેલો છે.

આશરે ૨૨,૦૦૦ લીટીઓનું મહાકાવ્ય ‘શ્રીરામાયણદર્શનમ્’ લેખકની શ્રેષ્ઠ કૃતિ છે, જેને ૧૯૫૫માં સાહિત્ય અકાદમી પુરસ્કાર પ્રાપ્ત થયો હતો. ૧૯૬૪માં કર્ણાટક સરકારે તેમને ‘રાષ્ટ્રકવિ’નો ખિતાબ એનાયત કર્યો હતો. ૧૯૬૮માં ઉમાશંકર જોશીને અને તેમને સંયુક્ત રૂપે જ્ઞાનપીઠ પુરસ્કાર એનાયત થયેલો. ૧૯૭૯માં તેઓ કેન્દ્રસ્થ સાહિત્ય અકાદમીના અને ૧૯૮૬માં કન્નડ સાહિત્ય પરિષદના માનાર્હ ફેલો નિમાયા હતા. ૧૯૮૮માં ભારતના રાષ્ટ્રપતિએ તેમને ‘પદ્મવિભૂષણ’ના ખિતાબથી નવાજ્યા હતા.