લાત ખાવાનું પુણ્ય ગધેડાનું કામ ગાયે કર્યું એ દેખાડવું કઈ રીતે?

બે-બે ગાયની લાતનું પુણ્ય? વાહ! તમે તો ધન્ય થઈ ગયા..

- રાજુ પટેલ

'તમે શું કરશો એ મને નથી ખબર, પણ કોઈ પણ હિસાબે તમારે આ બદનક્ષી રોકવાની છે.' મોતીવાલા મક્કમ અવાજમાં બોલ્યા.

દવે અને મેં મૂંઝાઈને એકબીજા સામે જોયું.

‘પણ સર, આ કામ અસંભવ છે, ગધેડાએ લાત મારી છે એ કોઈએ મોબાઈલમાં શૂટ કરી લીધું છે અને આવી ક્લિપ જંગલમાં આગની જેમ સોશિયલ મિડિયામાં ફેલાઈ જાય એમાં કોઈ કંઈ ન કરી શકે.’

‘કોઈ ન કરી શકે, પણ તમારે કરવાનું છે. સુધાકર તમને જે મદદ જોઈએ એ કરશે. ખેતશી મારો ખાસ દોસ્ત છે, વાત પૂરી. હવે જાઓ અને કોઈ ઉપાય શોધો.’

અમે બન્ને એકબીજાને જોઈ રહ્યા.

ખેતશી એટલે ખેતશીભાઈ દેઢિયા રાજકારણી અને ચર્ચામાં રહેતું નામ તો સુધાકર એન્જિનિયરમાંથી ખેડૂત બનેલો અભ્યાસુ.

મોતીવાલા, ખેતશીભાઈ અને સુધાકર ત્રણે કૉલેજકાળના પાકા મિત્રો. સુધાકરે એન્જિનિયરિંગ છોડી થોડાં વર્ષોથી મુંબઈ નજીક વસઈમાં જમીન ખરીદી ખેતી શરૂ કરી હતી અને ગાય-ભેંસ પણ પાળ્યાં હતાં. ત્રણે મિત્રો ઘણા સમયથી મળ્યા નહોતા. આજે સમયનો યોગ થયો એટલે ત્રણેય સુધાકરના વસઈ ખાતેના ફાર્મ હાઉસ પર મળ્યા. ત્યાં એક વિચિત્ર અકસ્માત થયો. સુધાકર પોતાની કેટલીક ખાસ ગાય ખેતશીભાઈ અને મોતીવાલાને બતાવી રહ્યા હતા. ગાયો બાંધી હતી એની નજીકમાં એક ગધેડો ઊભો હતો. અચાનક એ ગધેડાએ ખેતશીભાઈને લાત મારી. પહેલાં તો સુપરમૅનની જેમ ખેતશીભાઈ હવામાં ઊડ્યા, પણ પછી પોતાની મર્યાદાનું ભાન થતાં ભોંય પર પટકાયા. એમને પીઠમાં સખત માર વાગ્યો. તરત એમને હૉસ્પિટલમાં દાખલ કર્યા, પણ કાળનું કરવું તે ગર્દભે ખેતશીભાઈને લાત ફટકારી એનો કોઈએ વિડિયો ઉતારી સોશિયલ મિડિયામાં ફરતો મૂકી દીધો.

આ મોબાઈલ-વિડિયો ઉતારનારી પ્રજાતિ પણ અજીબ હોય છે. જાણે ભગવાને એમને આ જ કામ માટે પૃથ્વી પર મોકલ્યા છે એવું એ માનતી હોય છે. આ પ્રજાતિના પેલા માનવપ્રાણીને તો ખેતશીભાઈ અને ગધેડાવાળો સીન ઝડપીને ટીવીના કોઈ શોમાં વાઈલ્ડ કાર્ડ એન્ટ્રી મળી ગયા જેટલો આનંદ થયો.

કોઈ રાજકારણીને ગધેડો લાત મારીને ઉછાળે એવો વિડિયો હોય તો વિરોધ પક્ષવાળા તો ઠીક, સામાન્ય જનતા પણ ગેલમાં આવી જાય. રોજબરોજના જીવનમાં સતત લાત ખાતી જનતા રાજકારણીઓને લાત મારવા ઉત્સુક હોય છે, પણ મારી નથી શકતી એટલે બીજું કોઈ મારે તો હરખાય જ.