ડ્રેસ ડ્રામા

સ્ત્રીને જ કોઈ સમજી શક્યું નથી ત્યાં એની સમસ્યા સમજવી અને એ સમસ્યાનો ઉકેલ લાવવો કઈ રીતે?

- રાજુ પટેલ

જેઠાણી હોય કે શેઠાણી, આવી લુચ્ચાઈ કોણ ચલાવી લે?’

ગુસ્સો, ફરિયાદ અને અસહાયતાના મિશ્ર ભાવથી અવિન દોશીનો સ્વર કંપી રહ્યો હતો. મોતીવાલા કન્સલ્ટન્સીમાં આ વખતે એક વિચિત્ર સ્ત્રી-કેન્દ્રી સમસ્યા આવી હતી. મોતીવાલા કન્સલ્ટન્સીના સાહેબ મોતીવાલા, કલીગ દવે અને હું-અમે ત્રણે પુરુષો ગૂંચવણમાં પડી ગયા હતા, કેમ કે સમસ્યા સ્ત્રીની હતી. સ્ત્રીને જ કોઈ સમજી શક્યું નથી ત્યાં એની સમસ્યા સમજવી અને એ સમસ્યાનો ઉકેલ લાવવો એ તો સરકારી બૅન્કમાં જઈને પાસબુક ભરાવવા જેવું અઘરું કામ છે.

અવનિ એટલે દોશીપરિવારની નાની પુત્રવધૂ. દોશીપરિવાર સમૃદ્ધ અને પ્રતિષ્ઠિત પરિવાર હતો. પરિવારના બે યુવાન પુત્ર સંપથી પારિવારિક વ્યવસાય ચલાવી રહ્યા હતા, પણ બન્નેની પત્ની વચ્ચે રશિયા-યુક્રેન જેવો સંબંધ! અવનિની ફરિયાદ હતી કે એની જેઠાણી માહી બધાની સામે એની ઈજ્જતના દૂધપૌંઆ કરી નાખે છે.

એવું તે શું કરતી હતી માહી?

કપડાં અને ઘરેણાંની પસંદગીમાં માહી કરતાં વધુ કાબેલ હતી. ઘરના પ્રસંગમાં એ પોતાની દરોમ માલ કવી અવિન કલર અને ફૅશનની સૂઝને કારણે જુદી અને આકર્ષક લાગતી. માહીનાં કપડાં કે ઘરેણાં વધુ મોંઘાં હોવા છતાં અવિનની ચૉઈસ સામે ફીકાં લાગતાં. આમ થવાથી અવિનના કોઈ ઈરાદા કે પ્રયત્ન ન હોવા છતાં જાહેર પ્રસંગોમાં માહી એની દેરાણી અવિન સામે નાનમ અનુભવતી આથી માહીએ કંઈક એવું કરવા માંડ્યું કે પોતાનો મહિમા વધી ગયો અને અવિન નાનમ અનુભવવા માંડી!

અવિન કોઈ પણ નવો ડ્રેસ કે ઘરેણું ખરીદે તો એ વિશેની બધી માહિતી માહી કોઈ ને કોઈ રીતે મેળવી લેતી. બન્નેનાં ઘર જુદાં હતાં, પણ ઘણી ફ્રેન્ડ્સ અને સગાં કૉમન હોવાથી આ માહિતી મેળવવી બહુ મુશ્કેલ નહોતી. માહિતી મેળવ્યા બાદ માહી અદલોદ્દલ એવો જ ડ્રેસ કે ઘરેણું ખરીદી લેતી અને અવિન પહેરે એ પહેલાં માહી પહેરીને જાહેર પ્રસંગમાં આવતી. દાખલા તરીકે, લગ્નપ્રસંગમાં પહેરવા અવનિએ ખાસ કપડાં લીધાં હોય તો એ પહેલાં કોઈના જન્મદિવસ કે હાઉસ વૉર્મિંગ પાર્ટી જેવા સરખામણીએ નાના પ્રસંગમાં માહી એવાં જ કપડાં પહેરીને આવી જતી. આનાથી બે ગરબડ થતી. એક તો અવનિનું શૉપિંગ એક્સક્લુઝિવ રહેતું નહીં અને એણે માહીની કૉપી કરી હોય એવી છાપ પડતી.