નક્કામી ચીંજવસ્તુથી કંઈક કામનું બનાવો..

ઘરના ખૂણેખાંચરે પડી રહેલી વણવપરાયેલી સામગ્રીથી મેળવી શકાય છે ગૃહસજાવટના વિકલ્પ.

- વિશ્વા મોડાસિયા

ઘરમાં ઘણી વાર આપણે ખર્ચા બૅલેન્સ કરવા ઓછી જરૂરી હોય એવી સામગ્રી ખરીદવાનું ટાળતાં હોઈએ છીએ, જેમાં મોટા ભાગે ઘરસજાવટની વસ્તુનો સમાવેશ થતો હોય છે. ઘરસજાવટ માટેની વસ્તુ બીજી ચીજોની સરખામણીએ ઓછી વપરાશમાં લેવામાં આવે છે. વળી, આવી ચીજવસ્તુ થોડી મોંઘી પણ હોય. એમાંય સારી બ્રાન્ડની હોય તો તો પૂછવું જ શું?

- પણ શું તમે જાણો છો કે આપણા ઘરમાં જ કેટલીક એવી વસ્તુ હોય છે, જેનો ઉપયોગ આપણે સજાવટ માટે કરી શકીએ છીએ? આપણી મોટા ભાગની ગૃહિણીઓ તેલના ખાલી ડબ્બા, હોટેલના ઑર્ડરમાં આવતા ડબ્બા, શૅમ્પૂ તેમ જ કાચની ખાલી બૉટલ, પાણીની ખાલી બાટલી, વગેરે ઘરના કોઈ ને કોઈ ખૂણે કે માળિયા પર સાચવી રાખે છે.

સંઘર્યો સાપ પણ કામ લાગે એવી આપણી ઉક્તિ સાર્થક તો કરવી પડે ને? બસ, તો આજે આપણે એ જ વાત કરવી છે કે કઈ રીતે ઘરમાં વપરાયા વગર પડી રહેલી અમુક ચીજવસ્તુ આપણે ઘરસજાવટમાં કામે લગાડી શકીએ. એ માટે જરૂર છે માત્ર થોડા શ્રમ અને થોડા સમયની.. અને અલબત્ત, થોડી સૂઝની. આપણી ગૃહિણીઓ તો એમાં માસ્ટર છે જ!