AIને પરાસ્ત કરવા આવી રહ્યું છે OI

હજી હમણાં જ આંગણે આવીને તોફાન મચાવનારી આર્ટિફિશિયલ ઈન્ટેલિજન્સ ટેક્નોલૉજી પૂરેપૂરી ઘરમાં પ્રવેશી પણ નથી ત્યાં કમ્પ્યુટિંગની વ્યાખ્યા બદલી નાખે એવી ક્રાંતિકારી ટેક્નોલૉજી દરવાજે ટકોરા દે છે.

આર્ટિફિશિયલ ઈન્ટેલિજન્સના ઉપયોગની માણસે સીમા નક્કી કરવી પડશે.

- એઆઈનો વપરાશ આમ જ વધતો રહ્યો તો માણસની કુશળતા, કારીગરી, આવડત બધું એક-બે પેઢીમાં વીસરાઈ જશે અને માણસ મશીનનો ગુલામ થઈ પડશે.

- આ નવી બલા ચૅટ-જીપીટી તો બાળકોની ભાષા, ગણિત, ઈતિહાસ શીખવાના રસ, વિચારવાલખવાની માનસિક ક્ષમતાઓ બધું જ નષ્ટ કરી દેશે.

આર્ટિફિશિયલ ઈન્ટેલિજન્સ (એઆઈ-AI) ટેક્નોલૉજીના અનેક ફાયદા હોવા છતાં એના વિશે આવી અનેક ફરિયાદ હજી જૂની થઈ નથી, ત્યાં એઆઈ ટેક્નોલૉજીને જ જૂની સાબિત કરી દે એવી ક્રાંતિકારી ટેક્નોલૉજી-ઑર્ગનોઈડ ઈન્ટેલિજન્સ (ઓઆઈ-OI) મેદાનમાં આવી ગઈ છે.

શું છે ઑર્ગનોઈડ ઈન્ટેલિજન્સ?

જીવવિજ્ઞાન, બાયો-કમ્પ્યુટિંગ, ટેક્નોલૉજી, મશીન લર્નિંગ, બાયો-એન્જિનિયરિંગ જેવાં વિવિધ ક્ષેત્રોના ડઝન જેટલા આંતરરાષ્ટ્રીય નિષ્ણાત વિજ્ઞાનીઓ સાથે મળીને બાયોકમ્પ્યુટર તૈયાર કરવાના પ્રયાસમાં લાગ્યા છે. અમેરિકાની જોન્સ હોપકિન્સ યુનિવર્સિટીના પ્રોફેસર થોમસ હર્ટંગ અને એમની ટીમે તાજેતરમાં ફ્રન્ટિયર્સ ઈન સાયન્સ જર્નલમાં એક રિસર્ચ પેપર પ્રકાશિત કર્યું છે. લૅબોરેટરીમાં જીવંત મગજ બનાવવાના એમના સફળ પ્રયોગનાં પરિણામો દર્શાવીને એમણે ઑર્ગનોઈડ ઈન્ટેલિજન્સ (ઓઆઈ-OI)નો વિચાર આ પેપરમાં વહેતો મૂક્યો છે.