ખુશ્વી ગાંધી: હિસાબના કાળા-ધોળા પર એ રાખે છે બાજનજર

પિતા પાસે નાનપણથી સમાજસેવાના પ્રેક્ટિકલ પાઠ ભણનારી આ મુંબઈકર આગળ જતાં પ્રશાસન સેવામાં પ્રવેશીને દેશની સેવા કરવાનું સપનું જુએ છે.વખત જતાં ‘યુપીએસસી'ની પરીક્ષા પાસ કરીને એ રેવન્યૂ સર્વિસ ઑફિસર બને છે. મળીએ, અત્યારે મુંબઈના જોઈન્ટ ઈન્કમ ટૅક્સ કમિશનરના હોદ્દે બિરાજતી આ ગુજરાતી યુવતીને.

- સમીર પાલેજા

સ્કૂલના મિત્રો મૂવી જોવા કે પાર્ટી મનાવવા જતાં ત્યારે ખુશ્વી એના પિતાની આંગળી ઝાલીને પબ્લિક મીટિંગમાં જતી. મતદાનની ટકાવારી વધારવા માટેનું વોટ મુંબઈ કૅમ્પેન હોય, મ્યુનિસિપાલિટીની ચૂંટણીમાં સામાન્ય મતદારને ઉમેદવાર બનાવીને એને જિતાડવાની જીદ હોય કે પછી અન્ય કોઈ સમાજસેવાનાં કામ, દીકરી ખુથ્વી હંમેશાં એના પપ્પા મયંક ગાંધીનો પડછાયો બનીને રહેતી.

આવાં કોઈ પણ કૅમ્પેન કે ચર્ચાસત્રમાં પપ્પા માટે નોટ્સ બનાવવાનું કામ ખુથ્વી ખુશીથી કરી આપતી. સમજો કે ૧૮ વર્ષની થઈ ત્યાં સુધીમાં ખુશ્તીએ નાગરિકશાસ્ત્રનો બહોળો પ્રેક્ટિકલ અનુભવ લઈ લીધો.

કટ ટુ ૨૦૧૦..

ખુશ્વી કેન્દ્રીય લોકસેવા આયોગ (યુપીએસસી)ની પ્રિલિમિનરી પરીક્ષા પાસ કરે છે, પણ એની મેઈન્સ પરીક્ષામાં ફરજિયાત ભારતીય ભાષા તરીકેના ગુજરાતીના પેપરમાં એ નપાસ થાય છે એટલે બીજા વિષયનાં પેપર્સ ચેક જ નથી થતાં. નિરાશ થયા વિના ખુથ્વી ચુપચાપ ગુજરાતી પાક્કું કરવા બેસી જાય છે. બીજા વર્ષે એ પ્રિલિમ્સ, મેઈન્સ અને ઈન્ટરવ્યૂ ત્રણેય પાસ કરીને ઑલ ઈન્ડિયા લેવલે ૨૫૫મી રૅન્ક મેળવે છે. એને ઈન્ડિયન રેવન્યૂ સર્વિસિસ (ઈન્કમ ટૅક્સ)માં પ્રવેશ મળી જાય છે.

થોડા સમય પહેલાં મહારાષ્ટ્રના તત્કાલીન રાજ્યપાલ ભગતસિંહ કોશિયારીના હસ્તે ખુશ્વી ગાંધીને એમની જાહેર સેવા બદલ સમ્માનિત કરાયાં હતાં.

પિતા મયંક ગાંધીના જૂહ-મુંબઈસ્થિત નિવાસસ્થાને પ્રિયદર્શિની સાથે વાત કરતાં ખુથ્વી કહે છેઃ ‘આઈએએસ પછી સેકન્ડ ચૉઈસ તરીકે મેં રેવન્યૂ સર્વિસિસ જ રાખેલી, કેમ કે એનાથી ઉપરની ગણાતી ફોરેન સર્વિસ જોઈન કરીને વિદેશ જવું નહોતું અને પોલીસ અધિકારી-આઈપીએસ તરીકેનું કાર્ય મારા સ્વભાવમાં નહોતું.’

ખુશ્વી ઉમેરે છે કે રેવન્યૂ અધિકારી તરીકેનો અમારો ફાઉન્ડેશન કોર્સ હૈદરાબાદમાં થયો હતો. એક સિવિલ સર્વન્ટમાં જરૂરી એવી વિશિષ્ટતા તથા ચરિત્ર ઉપસાવવા માટેનો એ અભ્યાસક્રમ અત્યંત રસપ્રદ હતો. અમને તાલીમ આપવા ભારતના બેસ્ટ થિન્કર્સ આવતા. અનેક રાજ્યના રાજ્યપાલો, અરે! સ્વયં રાષ્ટ્રપતિ સાથે ચર્ચાસત્ર યોજાતાં. ઉદ્યોગજગત ને આઈઆઈએમ જેવી ટૉપ ઈન્સ્ટિટ્યૂટના પ્રશિક્ષકો સાથે સેશન્સ યોજાતાં.