આ ગુર્જર કન્યાની મહત્ત્વાકાંક્ષાને આકાશ પણ ટૂંકું પડે..

ગુજરાતી માધ્યમમાં ભણેલી ઍસ્ટ્રોફિઝિસિસ્ટ ડૉ. એકતા શાહની નસનસમાં ખગોળવિજ્ઞાન છે. બ્રહ્માંડનાં અગાધ રહસ્ય ઉકેલતી ડૉ. એકતાએ તાજેતરમાં એવું પરાક્રમ કર્યું છે, જેનાથી ગુજરાતી હોવાનો આપણને ગર્વ થાય.

- કેતન મિસ્ત્રી (મુંબઈ)

મધ્ય ગુજરાતના આણંદમાં રહેતાં લતાબહેન મ અને અર્જુનભાઈ શાહની એકની એક દીકરી ડૉ. એકતા શાહે કંઈ એવું કર્યું છે, જેનાથી દરેક ગુજરાતીની છાતી ચૌડી થાય. ઍસ્ટ્રોફિઝિસિસ્ટ એટલે ખગોળશાસ્ત્રી ડૉ. એક્તા શુક્રવાર, ૩૧ માર્ચની સવારે અમેરિકાના હવાઈથી ગુજરાતીઓને અંતરીક્ષ દર્શન કરાવવાની છે. કેક અને સુબારુ જેવા પાવરફુલ ટેલિસ્કોપની મદદથી ડૉ. એકતા શુદ્ધ ગુજરાતીમાં આ સ્કાય ઑબ્ઝવિંગ સત્ર યોજશે. વળી ગુજરાતી ક્યાંય પણ હોય- આણંદ, અમદાવાદ, અમરેલી, સુરત, મુંબઈ કે.. કેમ કે એ અંતરીક્ષ દર્શન કરાવશે ઈન્ટરનેટ પર ઝૂમ દ્વારા.

ડૉ. એકતા શાહ હાલ યુનિવર્સિટી ઑફ કેલિફોર્નિયા, ડેવિસમાંથી પોસ્ટ-ડૉક્ટરલ સ્કૉલર ઈન ઍસ્ટ્રોનોમી કરી રહી છે. જો કે આણંદથી કેલિફોર્નિયાનો એનો પ્રવાસ એટલો સરળ નહોતો. આણંદની ડી.ઝેડ. (ડાહ્યાભાઈ ઝવેરભાઈ) પટેલ હાયર સેકન્ડરી સ્કૂલમાં ગુજરાતી માધ્યમમાં ભણેલી એકતાને બાળપણથી જ અંતરીક્ષમાં કરોડો માઈલ દૂર આવેલા ગ્રહોમાં, તારામાં રસ. ટીવીમાં પણ એ આ વિશેના કાર્યક્રમો જ જોતી, એ વિશે વાંચતી.

એકતાના જીવનમાં નાટ્યાત્મક વળાંક આવ્યો ૨૦૦૯માં. બારમા ધોરણની પરીક્ષા બાદ એ અમદાવાદ ગયેલી. એક સવારે ત્યાં ટાઉન હૉલ પાસેથી પસાર થતાં એને ખગોળશાસ્ત્ર વિશે ચાલી રહેલા કાર્યક્રમ વિશે જાણ થઈ. એ અંદર પ્રવેશી અને એની સામે એક આખું વિશ્વ ખૂલી ગયું. ઍસ્ટ્રોનોમીમાં પણ કારકિર્દી ઘડી શકાય એની એને એ કાર્યક્રમમાં જાણ થઈ. કાર્યક્રમની પૂર્ણાહુતિ બાદ એમાંના એક વક્તા, જાણીતા ખગોળવિજ્ઞાની ડૉ. જે.જે. રાવલ સાથે ચર્ચા કરી અને એણે નક્કી કરી લીધું કે જીવનમાં પ્યૉર સાયન્સ એટલે કે ફિઝિક્સ જ ભણવું છે.

દુનિયાના સર્વશ્રેષ્ઠ ટેલિસ્કોપ દ્વારા ડૉ. એકતા કરાવે છે અંતરીક્ષ દર્શન શુદ્ધ ગુજરાતીમાં.