શિક્ષકદંપતીનો અઢી દાયકાનો આહલાદક પ્રવાસ-પિરિયડ શાંતાબહેન-ભીખાલાલ સીદપરા રાજકોટ

રાજકોટનાં આ શિક્ષકદંપતીએ કશ્મીરથી કન્યાકુમારી અને વિદેશમાં પણ પ્રવાસ ખેડ્યા છે. પાંચ વખત ચાર ધામ યાત્રા કરી, બે વાર અમરનાથ યાત્રા પૂરી કરી, બે વાર દક્ષિણનાં રાજ્યોમાં કન્યાકુમારી સુધી અને ગોવા, હરિદ્વાર, ઉદેપુર, ઉત્તરાખંડમાં વેલી ઑફ ફ્લાવર, નૈનિતાલ સહિત અનેક સ્થળોની મુલાકાત લીધી છે

રાજકોટની નગર પ્રાથમિક શિક્ષણ સમિતિ હસ્તકની શાળા નંબર-૬૦માં આશરે ૨૦ વર્ષ સુધી આચાર્ય તરીકે ફરજ બજાવી ચૂકેલા પ્રકૃતિપ્રેમી ભીખાલાલ સીદપરા માટે વૅકેશન પડતાં જ ટુરનો પિરિયડ શરૂ થઈ જાય. તેમનાં પત્ની શાંતાબહેનને પણ હરવાફરવાનો શોખ. દર વર્ષે આ શિક્ષકદંપતી વૅકેશન પડે એટલે પ્રવાસ પર નીકળી પડે. છેલ્લાં પચ્ચીસ વર્ષથી એમણે આ ક્રમ જાળવી રાખ્યો છે. હાલ પણ વર્ષે બે ટુર કરે છે. અને સીદપરાદંપતી માટે પ્રવાસ પર જવાનો નિયમ એ કે ક્યારેય ટુર ઑપરેટરની મદદ લેવાની નહીં, પોતાની રીતે જ કાર્યક્રમ ઘડવાનો.