હીરા નગરી ફરતે શિક્ષણના આ પણ છે વિકલ્પ..

ટેક્સ્ટાઈલ અને ડાયમંડ સિટીની જેમ સુરત હવે દક્ષિણ ગુજરાતના મહત્ત્વના શૈક્ષણિક કેન્દ્ર તરીકે પણ કાઠું કાઢી રહ્યું છે. આવો, અહીંની કેટલીક યુનિવર્સિટી વિશે જાણીએ.

'વીર નર્મદ સાઉથ ગુજરાત યુનિવર્સિટી’ના વાઈસ ચાન્સેલર ડૉ. કિશોરસિંહ ચાવડા: ગરીબ-પછાત વિદ્યાર્થીઓને સરકારની અનેક યોજનાનો લાભ મળે છે.

૬૫માં સ્થપાયેલી વીર નર્મદ સાઉથ ૧૯ ગુજરાત યુનિવર્સિટીના કાર્યક્ષેત્રમાં સાત જિલ્લા આવે છે. એમાંથી ચાર જિલ્લામાં આદિવાસી પ્રજાની વસતિ વધુ છે એટલે આ યુનિવર્સિટીમાં પણ મોટા ભાગના વિદ્યાર્થી વિવિધ જનજાતિના અને ગરીબ હોય છે.

યુનિવર્સિટીના વાઈસ ચાન્સેલર ડૉ. કિશોરસિંહ ચાવડા કહે છે કે દક્ષિણ ગુજરાતમાં ઘણી ખાનગી યુનિવર્સિટી છે એ વાત સાચી, પણ બધાનું ધ્યેય અલગ છે. અમારો ઉદ્દેશ ગરીબ, પછાત અને જનજાતિ વર્ગના વિદ્યાર્થીઓને સારું શિક્ષણ આપવાનો છે. અમારા કાર્યક્ષેત્રના સાત જિલ્લાની વસતિ ૧.૪૦ કરોડ જેટલી છે. ત્યાંના ૮૦ ટકા વિદ્યાર્થીઓ ઉચ્ચ શિક્ષણ લેવા અમારે ત્યાં આવે છે. અમારા કૅમ્પસમાં ૪૫થી વધુ કોર્સ ચાલે છે. એ ઉપરાંત, સ્થાનિક જરૂરત પ્રમાણે ટેક્સ્ટાઈલ્સ, મરીન, ટ્રાન્સ્પોર્ટેશન, ડાયમંડ, ઍવિયેશન જેવા વિષયોમાં સર્ટિફિકેશન અભ્યાસક્રમ છે.

ડૉ. ચાવડા કહે છે કે હમણાં બે સેમેસ્ટરની પરીક્ષામાં સાડા પાંચ લાખ વિદ્યાર્થી બેઠા હતા. કુલ ૩૫ લાખ ઉત્તરવહી તપાસવામાં આવી. આનાથી અમારી યુનિવર્સિટીના વ્યાપનો ખયાલ આવી જશે. અમારી સાથે ૩૦૦થી વધુ કૉલેજો સંલગ્ન છે. ૨૧૦ એકરમાં યુનિવર્સિટીનું કૅમ્પસ ફેલાયેલું છે. સરકારી યુનિવર્સિટી હોવાથી ફીનું ધોરણ નીચું છે અને સરકારની તમામ ૧૮૩ યોજનાનો લાભ જનજાતિ, ગરીબ અને પછાત વર્ગના વિદ્યાર્થીઓને મળે છે. યુનિવર્સિટીએ ૨૦૧૪થી ફીમાં એક રૂપિયાનો પણ વધારો કર્યો નથી.

ડૉ. કિશોરસિંહ ચાવડા ઉમેરે છે કે અમારે ત્યાં ભલે સામાન્ય લોકો શિક્ષણ લેવા આવે, પણ અમારું રિઝલ્ટ હંમેશાં ૯૦ ટકાથી ઉપર આવે છે. બીજું, અમારા કૅમ્પસમાં જે સવલતો છે એમાંની અમુક કદાચ કોઈ પાસે નહીં હોય. અમારી પાસે ઈનડોર સ્વિમિંગ પૂલ છે, જે ઘણી હોટેલ પાસે પણ નથી. ક્રિકેટ, હૉકી અને બાસ્કેટબૉલનાં મેદાન તથા ઍથ્લેટિક ટ્રેકથી પણ અમે સજ્જ છીએ.